Өймөкөөн улууһун баһылыктара пуорумтан үгүһү билэн кэллилэр

Бу күннэргэ Москва куоракка «Төрүт дойду – Арассыыйа күүһэ» бүтүн Арассыыйатааҕы пуорум түмүктэннэ.

Саха сириттэн кыттыбыт 160 оройуон уонна нэһилиэк баһылыктарын кытта Тымныы полюһуттан Өймөкөөн улууһуттан улуус баһылыгын э.т. Иван Максимов, Томтор нэһилиэгин баһылыга Алексей Винокуров, Өймөкөөн нэһилиэгин баһылыга Павел Васильев суолталаах тэрээһиҥҥэ кыттыыны ыллылар.

– Пуорум үс сүрүн хайысханан ааста «Сүрүн күүс – дьон», «Сайдыы күүһэ» уонна «Үгэс күүһэ». Биһиги бүтүн Арассыыйатааҕы пуорум чэрчитинэн ВДНХ араас былаһааккаларынан ыытыллыбыт мунньахтарга, «төгүрүк остуолларга», санаа атастаһыыларын былаһааккаларыгар сырыттыбыт. Дойду Аҕа баһылыга Владимир Путин ыйаахтарын уонна национальнай бырайыактары миэстэтигэр олоххо киллэрэ сылдьар дьон быһыытынан эрэгийиэннэр ситиһиилэрин туһунан быыстапкалары сиһилии көрдүбүт, үөрэттибит, уопут атастастыбыт. Live Arena диэн былаһааккаҕа дойду Бэрэсидьиэнэ Владимир Путины кытары көрүстүбүт. Пуорумҥа сылдьан көрбүт, санаа атастаспыт билиибит, биллэн турар, улууспут социальнай-экэнэмиичэскэй олоҕун тупсарарга, сонун сүүрээннэри толкуйдуурга, тобуларга сыл саҥатыттан саҕалаан үлэлииргэ олус туһалаах тэрээһин буолла, — диэн санаатын үллэһиннэ улуус баһылыгын э.т. Иван Максимов.

Өймөкөөн улууһун дэлэгээссийэтигэр киирсэн сылдьыбыт Томтор нэһилиэгин баһылыга  Алексей Винокуров кэпсииринэн, баһылыктар күн бокуойа суох, бириэмэлэрин чааһынан буолбакка, мүнүүтэнэн бэрээдэктээн сылдьыбыттар.

— Дьэ, оннук элбэҕи биллибит-көрдүбүт.  Өрөспүүбүлүкэ нэһилиэктэрин баһылыктарын тэҥэ, биһиги курдук хайысхалаах үлэлээх атын эрэгийиэннэргэ олорор тыа сирдэрин баһылыктарын кытта сирэй көрсөн кэпсэтэн, эмиэ уопут атастастыбыт. Олох-дьаһах хомунаалынай хаһаайыстыбаларын, нэһилиэктэр, бөһүөлэктэр эйгэлэрин тупсарыы, суол оҥоһуутун уо.д.а. олус наадалаах боппуруостарга санаа атастаһар «төгүрүк остуоллар» тэриллибиттэрэ барыбытын сомоҕолоото, биир тыыннаата.  Онон саҥаны, сонуну билбит-көрбүт дьон быһыытынан сылбытын бэркэ  аҕалаатыбыт, — диэн санаатын үллэһиннэ Алексей Винокуров.

Маны таһынан, Өймөкөөн улууһун дэлэгээссийэтэ РФ Федеральнай мунньаҕын сэбиэтин сэнээтэрэ Сахамин Афанасьевы, Өймөкөөн улууһугар көмүс хостуур тэрилтэлэр салайааччыларын кытта сирэй көрсөн, оройуон социальнай-экэнэмиичэскэй сайдыытыгар сыһыаннаах боппуруостары ырытыста. «Былырыын Өймөкөөн улууһа Олоҥхо ыһыаҕын ыыппыт буолан, үгэс быһыытынан быйыл Коломенскай пааркатыгар ыһыах тэрийиэхтээх. Онон сибээстээн Арассыыйа Федерациятын Президенигэр Саха Өрөспүүбүлүкэтин сис бэрэстэбиитэлистибэтин (постпредствотын) уонна Москва куорат Коломенскай оройуонун дьаһалтатын кытта тэрээһин боппуруостары дьүүллэстибит», — диэн бэлиэтээтэ улуус баһылыгын э.т. Иван Максимов.

Ити курдук, Өймөкөөн улууһун бэрэстэбиитэллэрэ олус туһалаах тэрээһиҥҥэ сылдьан, бэрт элбэҕи биллилэр-көрдүлэр.