Өймөкөөн улууһун ходуһаларын уу ылан, отчуттарга уустуктары үөскэттэ

Өймөкөөн улууһугар быйылгы оттооһун былаана 3660 туоннанан быһыллыбыта.

Улуустааҕы Тыа хаһаайыстыбатын управлениетын салайааччыта Руслан Атласов иһитиннэрбитинэн, улуус отчуттара бу күннэргэ барыта 1311,5 туонна оту (35,8%) кэбистилэр. Ол иһигэр, Томтор нэһилиэгэр отчуттар 541 туонна (44%) оту бэлэмнээтилэр. Үчүгэй нэһилиэгэр 35,5 туонна (9,6%) кэбиһии турда. Өймөкөөннөр 339 туоннаны (30,8%) кэбистилэр. Сордоҥноох нэһилиэгэр тыа хаһаайыстыбатын бородууксуйатын оҥорон таһаарааччылар холбоон 332  туонна (55,3%) оттоннулар. Оттон Төрүт нэһилиэгэр отчуттар билиҥҥитэ 64 туонна (19,3%) оттоохтор.

Улууска ааспыт нэдиэлэҕэ тохтоло суох ардаан, сорох нэһилиэктэргэ ходуһаларын уу ылан, уустуктары үөскэттэ. «Үчүгэй нэһилиэгин отчуттарын  улуус уопуттаах сылгыһыта Семен Винокуров кини сылгыларын көрөр баазатыгар Дьэкэйгэ кэлэн оттуурга ыҥырда. Онон бу күннэргэ сорох отчуттар ол эҥэр баран оттуохтара. Быйыл оттооһуҥҥа үгүс улууска уустук дьыл буолан, урукку сылларга курдук бэлэм көмө оту тиэйии кыаллыа суоҕа. Онон улуус отчуттара сыл тахсар  отторун бэйэлэриттэн булунар соруктаахтар«, — диэн бэлиэтээтэ Руслан Атласов.