Өймөкөөн улууһун нэһилиэктэригэр тустаах көмө оҥоһуллар

Өймөкөөн улууһугар айылҕа алдьатыылаах халаана олохтоохторго улахан хоромньуну аҕалла.

СӨ Гражданскай оборона дьыалаларын уонна дьон олоҕор куттала суох буолууну хааччыйар министиэристибэтэ өрөспүүбүлүкэ материальнай резервэтиттэн Өймөкөөн улууһугар көмө чэрчитинэн 500 ыксаллаах быһыы-майгы усулуобуйатыгар анаан оҥоһуллубут дьон аһыыр аһын, 3 балаакканы, 2 көһө сылдьар куукунаны, 5 «тепловой пушканы», 12 мотопомпаны уонна 200 иһэр ууну хачайдыыр, ыраастыыр фильтрдары, 5 генераторы уонна 5 «бензопиланы», 2 дьону көһөрөр уонна курууһу таһар оҥочону Өймөкөөн улууһун дьаһалтатын бэрэстэбиитэлигэр тиэртэ.

Бу куруус быыһааччылар сайаапкаларынан көтөн кэлиэхтээх сөмөлүөтүнэн тиэрдиллиэҕэ. Балаһыанньаттан көрөн, дьыала уустугурдаҕына, эбии көмө эмиэ ыытыллыаҕа.
Бу туһунан министиэристибэ пресс-сулууспапата иһитиннэрдэ.

Улуус баһылыга Александр Оконешников уоппускатын тохтотон, бу күннэргэ дьонун-сэргэтин кытта Өймөкөөн уонна Томтор нэһилиэктэринэн сылдьан, айылҕа иэдээниттэн тахсыбыт боппуруостары быһаарыыга үлэлэһэр.