Өймөкөөн улууһун нэһилиэктэригэр 60-тан тахса кыраадыс тымныы бэлиэтэннэ

Ахсынньыга сылыйан баран, ый бүтүүтэ тымныыбыт баарын биллэрэн эрэр.  

Биллэн турар, бастакынан чысхаан тымныы полюһунан аатырар Өймөкөөҥҥө билиннэ. Бу сарсыардаттан улуус социальнай ситимнэригэр араас нэһилиэктэн -60 кыраадыһы көрдөрөр хаартыскалар тарҕаннылар. Ол курдук, Томторго, Сордоҥноххо -60, Өймөкөөн нэһилиэгэр -64 кыраадыс тымныы буолбутун хаартыскаларынан көрө-көрө, үксүбүт сылаас дьиэҕэ да олорон тоҥмукка дылы буоллубут.

Онон тымныы эстэпиэтэтин Өймөкөөн улууһа, норуокка биллэринэн Тымныы полюһун быһыытынан, быйыл да бэйэтэ саҕалаата.  Аҕыйах хонуктааҕыта сааскы халлаанныы тыган турбут күн, туман быыһыгар саһан хаалла. Саҥа дьылга манна өссө тымныйыа дииллэр…