Салгыы
Өймөкөөн улууһун түмсүүтэ Олоҥхо ыһыаҕар бэлэмнэнэр

Өймөкөөн улууһун түмсүүтэ Олоҥхо ыһыаҕар бэлэмнэнэр

02.02.2023, 14:31
Бөлөххө киир:

Бу күннэргэ Өймөкөөн улууһун түмсүүтэ өрөспүүбүлүкэтээҕи Олоҥхо ыһыаҕар өйөбүл буолар тэрээһиннэри ыытар тэрээһин мунньаҕы ыытта.

Биир дойдулаахтар түмсүүлэрин салайааччыта Анна Атастырова олунньу ортотугар киин куоракка оройуон талааннаах дьоно аан дойдуга тымныытынан аатырар Өймөкөөннөрүн билиһиннэрэ кэлэллэрин туһунан  иһитиннэрдэ. Бу тэрээһин Аһымал (благотворительный) кэнсиэр быһыытынан быйыл  Өймөкөөн улууһугар ыытыллар Олоҥхо ыһыаҕар бэлэмнэниигэ өйөбүл үбү хомуйууга марафон быһыытынан былааннанар. Мунньахха кыттыбыт дьон «Тымныы полюһуттан төрүттээх атын улуустарга олорор талааннаах биир дойдулахтырбытын бу суолталаах тэрээһиҥҥэ кытыннарыахха» диэн этии киллэрдилэр. Ол курдук, Өймөкөөн нэһилиэгиттэн төрүттээх, Дьокуускай куоракка олорор талааннаах виртуоз-хомусчут Георгий Слепцов, Хара Тумултан төрүттээх эдэр ааттаах-суоллаах ырыаһыт Екатерина Черкашина-ЧКРШ, Сордоҥноох нэһилиэгиттэн төрүттээх, Амма күөрэгэйинэн биллэр СӨ култууратын үтүөлээх үлэһитэ, Абаҕатааҕы култуура дьиэтин дириэктэрэ Екатерина Яковлева, Өймөкөөн нэһилиэгиттэн төрүттээх, Таатта мааны кийиитэ, көхтөөх уопсастыбанньык, Өймөкөөҥҥө талааннаах ырыаһыт быһыытынан аатын дорҕоонноохтук ааттаппыт Январина Егорова, Сордоҥноох нэһилиэгиттэн төрүттээх, Горнай улууһун Орто Сурт нэһилиэгин  кулуубун уус-уран салайааччыта, дьиэ кэргэн уонна нэһилиэк  «Чысхаан» ВИА-тын төрүттэччи, мелодист Алексей Вензель, Төрүт нэһилиэгиттэн төрүттээх Уус-Ньара бөһүөлэгин урбаанньыта,  саха эстрадатын сулуһа Афанасий Андросов-Джумурад уонна да атын таланнаах дьон ааттарын ааттаан туран, төрөөбүт улуустарын өйүүллэригэр ыҥырыы ыытарга сүбэлэстилэр.

Суолталаах тэрээһининэн сибээстээн, киин куоракка уонна атын улуустарга олорор биир дойдулаахтары түмэн, харчынан көмө оҥорор сорук турар. Бу үлэни биир дойдулаахтар түмсүүлэрэ сүрүннүөҕэ.

Сордоҥноох нэһилиэгиттэн төрүттээх, Дьокуускай куорат 29 №-дээх оскуолатын учуутала Тимур Ядреев улуус таксистарын түмэн, ыһыах икки күнүгэр дьоҕус таксопаарканы тэрийэргэ этии киллэрдэ. Кырдьык, ыһыахтыыр түһүлгэҕэ  ыалдьыттары төттөрү-таары икки күнү быһа  таһыы, араас тэрээһиннэр ыытыллар сирдэригэр тиэрдии олус наада уонна тирээн турар боппуруос.  Сорох суолталаах  тэрээһиннэр Өймөкөөн нэһилиэгэр Саха сирин 1-кы гильдиялаах атыыһыта Н.О. Кривошапкин уһаайбатыгар, Томтор уонна Өймөкөөн нэһилиэктэрин икки ардыгар турар, саха улуу бөлөһүөгэ А.Е. Кулаковскай-Өксөкүлээх Өлөксөй  Өймөкөөн улууһугар буолбут гражданскай сэрии түмүктэниитигэр анаммыт Эйэ ыһыаҕын тэрийэн, 1924 сыллаахха сэргэ туруортарбыт Үрэх Төрдө сиригэр ыытыллыахтара. Бу 98 сыл устата күн бүгүҥҥэ диэри бэлиэ буолан турар, норуот маастара, саха омугун төрүт итэҕэлин, дьарыгын иҥэринэ сылдьар, СӨ Духуобунаһын академиятын академига Борис Неустроев-Мандар Уус анаан кэлэн оһуордарын ойуулаан барбыт сэргэлэрэ, биллэн турар, Олоҥхо ыһыаҕын ыалдьыттарын болҕомтотун улаханнык тардыаҕа.  Куорат оскуолатын учууталын этиитин биир дойдулаахтара олус биһирии иһиттилэр.  Бу боппуруоһу олоххо киллэриигэ тус бэйэтэ үлэлэһэригэр сорудахтаабыттарын, Тимур Ядреев ылынна.

Кини этиитинэн, такси суоппардара бары биир кэлим пуормалаах буолуохтара. Оччотугар ыһыах ыалдьыттара эрэ буолбакка,  чугастааҕы нэһилиэктэр олохтоохторо үгүстэрэ да Олоҥхо ыһыаҕар кыттар кыахтаныахтара. Ити курдук, Өймөкөөн улууһун Землячествотын чилиэннэрэ төрөөбүт дойдуларыгар ыытыллар ыһыахха туох өйөбүлү оҥоруохтарын туһунан үгүс этиилэри киллэрдилэр.

Кэрэхсэбиллээҕэ баар, бэйэ-бэйэҕэ найыласпакка, араас этиилэри киллэрбит дьон, баҕа санаалара олоххо киирэригэр көхтөөхтүк кыттыах,  тустаах дьыаланы тус бэйэлэринэн сүрүннүөх  буоллулар.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
19 июня
  • 16°C
  • Ощущается: 15°Влажность: 63% Скорость ветра: 1 м/с

Сообщить об опечатке

Текст, который будет отправлен нашим редакторам: