Өймөкөөн уонна Абый улуустарыгар чөлүгэр түһэрэр үлэ түмүктэнэн эрэр

Халаантан эмсэҕэлээбит Өймөкөөн уонна Абый улуустарыгар чөлүгэр түһэрии үлэтэ бүтэһик түһүмэҕэр киирдэ диэн sakha.gov.ru иһитиннэрэр.

Бу туһунан СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников бэрэссэдээтэллээх бырабыыталыстыба хамыыһыйатын мунньаҕар кэпсэттилэр.

Дмитрий Садовников чөлүгэр түһэрии үлэтэ балаҕан ыйын 30 күнүгэр диэри түмүктэниэхтээх диэн тоһоҕолоон эттэ. Бэрэссэдээтэли бастакы солбуйааччы ыксаллаах быһыы-майгы эрэсиимин устар боппуруоһу көрөргө сорудахтаата.

Бүгүҥҥү туругунан Абый улууһугар ууттан эмсэҕэлээбит олорор дьиэлэри өрөмүөннээһин түмүктэннэ. Өймөкөөн улууһугар хаалбыт 8 дьиэҕэ үлэ бара турар. Ситэриилээх былаас уорганнарыттан 34 киһиттэн турар түөрт биригээдэ бу нэдиэлэҕэ былааннаммыт үлэни барытын түмүктүөхтээх.

«Үбүлээһин бары источниктарыттан үп-харчы тарҕаммыт. Регалменныыр үлэлэр быраап нуормаларыгар сөп түбэһиннэриллэллэр. Муниципалитеттарга уонна эмсэҕэлээбит дьоҥҥо көмө харчы тириэрдиллэллэр. Сылааһы биэрии саҕаланна, СӨ Олох-дьаһах, коммунальнай хаһаайыстыба уонна энергетика министиэристибэтэ улуустар сайаапкаларынан үлэлэһэр. Ону сэргэ сүөһү кыстыыр аһылыгын былаанын толорорго сайабылыанньаларга эмиэ төлөбүрдэр салҕанан бараллар», — диэн экологияҕа, айылҕаны туһаныыга уонна ойуур хаһаайыстыбатыгар  миниистири солбуйааччы Анатолий Алексеев эттэ.

Өймөкөөн улууһугар дьиэлэрин-уоттарын бүтүннүү сүтэрбит ыалларга элбэх кыбартыыралаах дьиэ тутуута салҕанар. Алдьаммыт-кээһэммит 89 дьиэттэн 81 дьиэ чөлүгэр түһэриллибит.

Биир кэлим судаарыстыбаннай өҥөлөр порталларын (ЕПГУ) нөҥүө биир кэмнээх материальнай уонна үп-харчы көмөтүгэр сайаапкалары ылыы атырдьах ыйын 17 күнүгэр түмүктэммитэ, атырдьах ыйын 27 күнүгэр диэри сайабылыанньалар бары көрүллүбүттэр. Уопсайа 2631 сайабылыанньа киирбит, онтон 1592 сөптөөх быһаарыы ылыллыбыт. Алдьаммыт дьиэлээхтэрэ Тутуу министиэристибэтин нөҥүө биир кэмнээх төлөбүр оҥоһулларыгар үп улуустарга тиийбит.