Өймөкөөн үс нэһилиэгэр олорор дьиэ тиэргэннэригэр уу киирдэ

От ыйын 8-9 күннэригэр элбэх сөҥүү түһэн, Өймөкөөн улууһун үс нэһилиэгэр муниципальнай таһымнаах үрдүк бэлэмнээх буолуу эрэсиимэ биллэрилиннэ.

Индигир өрүс үөһээ тардыытыгар суукка иһигэр уу таһыма  50-тан  70 см диэри үрдээтэ.

Сордоҥнооххо алта тиэргэн,  Томторго (Куйдуһун учаастага) 18 тиэргэн, Өймөкөөҥҥө  5 тиэргэн ууга барда.

Маны таһынан «Өймөкөөн»  өрөспүүбүлүкэтээҕи суол 156 км уу киирдэ. Онон Томтор уонна Сордоҥноох икки ардыгар айан-сырыы тохтоото.

Гидрометеорологтар сабаҕалааһыннарынан, чугастааҕы биир-икки сууккаҕа  уу таһыма салгыы үрдүөн сөп.

Билигин миэстэлэринэн суукканы эргиччи дьуһуурустуба олохтонно диэн суһал ыстаап иһитиннэрдэ.