Өймөкөөҥҥө 58 дьиэни уу ылла

Өймөкөөҥҥө үс бөһүөлэк, ол иһигэр Хара Тумул уонна Биэрэк Үрдэ бүтүннүү ууга барда диэн СӨ Быыһыыр сулууспа иһитиннэрэр.

Бүгүн киэһэ 18.00 ч. 58 дьиэ — Өймөкөөҥҥө 33, Биэрэк Үрдүгэр 15, Хара Тумулга 10 дьиэни уу ылла.

Бу икки бөһүөлэккэ бүтүннүү кэриэтэ ууга бардылар. Өймөкөөҥҥө бөһүөлэк сүрүн өттө эмиэ ууга олорор, оттон дьаһалта дьиэтин муостатыгар диэри уу киирдэ. Оскуола өттүгэр, үрдүк сиргэ сорох дьиэҕэ уу тахса илик.

Билиҥҥитэ уу ылбыт дьиэлэриттэн 84 киһи көһөрүллүбүт, быстах кэмҥэ олорор пууҥҥа 34 киһи киирбит.

Нэһилиэк дьаһалтата тэрийэн, биэс оҥочонон уонна олохтоохтор бэйэлэрин күүстэринэн уон биэс киһи оҥочонон дьону таһаллар.
ЫБММ суһал бөлөҕө уонна СӨ Быыһыыр сулууспатын 14 быыһааччыта халааннаабыт сирдэргэ тиийдилэр.