Өймөкөөҥҥө аата суох хайаҕа Кулаковскай аата иҥэриллиэ

Бүгүҥҥү Ил Түмэн уочараттаах 42-c пленарнай мунньаҕар Өймөкөөн улууһугар Сунтаар Хайатын арҕаһыгар баар аата суох хайаҕа Алексей Кулаковскай аатын иҥэрэр туһунан уураах бырайыагын ылыннылар.
Сүрүн дакылааччыт Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Владимир Прокопьев эппитинэн, бу бырайыак ааспыт сыл сэтинньитигэр киирбит. Көҕүлээччилэринэн Нуучча географическай уопсастыбатын Саха сиринээҕи салаата буолар. Саха норуотун уһулуччулаах киһитин Алексей Кулаковскай аатын хайаҕа иҥэрэр туһунан быһаарыныыны Өймөкөөн улуустааҕы мунньаҕынан ылынан, Ил Түмэн сис кэмитиэтигэр бигэргэппиттэр.
Владимир Прокопьев бэлиэтээбитинэн, хайаҕа маннык ааты иҥэрии биһиги практикабытыгар аан бастакы буолар. Ааты иҥэрии процедурата федеральнай таһымҥа хайдах барарыгар кэккэ боппуруостар үөскүүллэр диэн парламент спикерэ Алексей Еремеев ыйыппытын, көҕүлээччилэринэн Ил Түмэн буоларынан, сөптөөх докумуоннары бэлэмниэхпит диэн быһаардылар.
Сообщить об опечатке
Текст, который будет отправлен нашим редакторам: