Өймөкөөҥҥө айан суолун өрөмүөннээһин тэтимнээхтик ыытыллар

Бу күннэргэ халаан уутуттан улаханнык эмсэҕэлээбит  Өймөкөөн улууһугар айылҕа иэдээнин содулун туоратар үлэ тэтимнээхтик ыытыллар.

Томтор нэһилиэгин баһылыга Алексей Винокуров бүгүҥҥү күҥҥэ туох үлэ ыытылларын маннык билиһиннэрдэ:

— Суолу оҥорооччулар кэлэн, Томтор Куйдуһун суолун кута сылдьаллар.   Өймөкөөн уонна Сордоҥноох нэһилиэктэрин Томтору кытта сибээстиир муниципальнай  суоллары эмиэ оҥоро сылдьаллар. 

Бүгүн суолу оҥорооччуларга эбии «Халыма» федеральнай трассаны Уус-Ньара эҥэр көрөр-истэр суол үлэһиттэрэ Агаякан муостатын өрөмүөннээн баран, Куйдуһун үрэхтэн Индигиир өрүскэ диэри суолу оҥоро кэллилэр. Онон Томтор нэһилиэгин отчуттара, суол суоҕуттан хаайтара сытар дьон, ходуһаларыгар тиийэр суол сотору кэминэн  арылларын эрэнэ кэтэһэллэр.  Өймөкөөҥҥө халаан уутун хоромньутун ааҕа барбыт хамыыһыйа чилиэннэрин  үс «Сокол» вездехонунан тэрийэн ыыппыппыт. Томтор нэһилиэгэ сүрүн киин буоларынан сибээстээн, киин куораттан кэлбит гуманитарнай көмөнү эмиэ мантан нэһилиэктэринэн арааран ыытабыт. Маныаха бэрт тэрээһиннээх үлэни Н.М. Заболоцкай-Чысхаан аатынан кыраайы үөрэтэр түмэлтэн Айталина Иванова салайааччылаах  үлэһиттэрэ ыыталлар.  Маны таһынан, Өймөкөөн улууһун таксистара күннэри-түүннэри гуманитарнай көмөнү быыстала суох тиэйэн аҕала тураллар. 

Томторго халаантан эмсэҕэлээбит ыалларбыт дьиэлэрин  уутун уочаратынан пуомпанан  оборторо сылдьабыт.  Бу күннэргэ СӨ Үлэ уонна социальнай көмүскэл министиэристибэтиттэн  элбэх киһилээх анал исписэлиистэр дэсээннэрэ кэлэн үлэлээтэ.

Нам улууһуттан уустук кэми бэйэтинэн ааспыт исписэлииһи аҕалбыттара, дьоҥҥо үгүс туһалаах сүбэни биэрдэ. 

Билигин Өймөкөөн суола өрөмүөннэниэр диэри вездеходтар сылдьаллар. Үчүгэй нэһилиэгин ыстаадаларыгар сылдьар көлөнү Павел Сивцев быстах кэмҥэ уларсан, олуһун абыраата. Бу киэһэ эмиэ вездеходунан Өймөкөөҥҥө 60-ча килиэби буһаран ыытыахпыт. Ити курдук, күн аайы айылҕа иэдээнин кэнниттэн чөлүгэр түһэрии үлэтин ыытабыт, — диэн сырдатта Алексей Винокуров.