Өймөкөөҥҥө ардыыр, хаардыыр уонна… сибэкки үүнэр

Бу күннэргэ айылҕа араас дьиктилэрин көрөн соһуйабыт эрэ.

Аҕыйах хонуктааҕыта Өймөкөөн улууһун Төрүт нэһилиэгэр Атласовтар дьиэ кэргэн тиэргэннэригэр бу маннык сайыҥҥылыы сибэккилэр үүнэн соһуттулар.

Бу урукку хотоннорун күрүөтэ маннык сибэккилэммит.

Дьиктитэ баар, сибэкки араас көрүҥэ хойуутук үүммүт.

Дьиэлээх хаһаайка Розалия Атласова Төрүккэ кийиит. Кини төрдө — Үөһээ Бүлүү.

— Тымныы полюһугар Өймөкөөҥҥө ыал буолан олохсуйбутум өр буолла да, балаҕан ыйыгар бу маннык хойуутук сайыҥҥы сибэкки үүммүтүн өйдөөбөппүн. Өссө манна тойон ыҥырыа кытта көтө сылдьара. Хортуоппуйбун хомуйа сылдьан, ити сибэккилэри бэлиэтии көрөн,  хаартыскаҕа түһэрэн үйэтиттим, — диэн кэпсиир Розалия Григорьевна.

Атласовтар тиэргэннэрэ тыа быыһыгар турар буолан, күһүҥҥү кырааска барыта баар.

Аны манна сир аһа, тэллэй кытта үүнэр. Онон тыаҕа ыраата барбакка, быйыл күһүн ыал ийэтэ тиэргэниттэн кыһын сиир уохтатын, маҥан тэллэйи  (шампиньон) үргээн кыһыҥҥыга хаһаанна.

Розалия Григорьевна 8 кг уохтаны хомуйан, быйылгы хаһааска минньигэс отон эбилиннэ.

Оттон балаҕан ыйын 6 күнүгэр сайыҥҥы сибэкки иккистээн тыллан, дьиэлээхтэр санааларын көнньүөртэ. Өймөкөөн улууһугар быйыл сайыны быһа ардаан, хайаларга хаардаан, сибэкки үүнэр халлаана буолбатах.  Онон итинник хойуутук нэһилиэги тилийэ сибэкки  үүммүтэ — дьикти. Ол оннугар олохтоохтору тапталлаах масленок-тэллэйдэрэ олох үүммэккэ хомотто.