Өймөкөөҥҥө бу киэһэ -67 кыраадыс тымныйда

Бу сарсыарда Тымныы полюһугар Өймөкөөн улууһугар социальнай ситимнэринэн  60-тан тахса кыраадыс тымныы түспүтүн туһунан иһитиннэрии тарҕаммыта.

Күн киэһэриитэ: «Киэһээнэн тымныыбыт өссө эбиллибит, хас кыраадыс буолбутуй? -70 кыраадыска чугаһаан эрэр быһыылаах. Кыраадыскыт төһөнү көрдөрөр?» диэн ыйытыы үксээтэ. Онно Төрүттэн -58, Өймөкөөнтөн — 65, Сордоҥноохтон -67 кыраадыс тымныы диэн биллэрдилэр.

«Наһаа да сылайдыбыт тымныыттан, хаһан былыт кэлэр…» диэн Тымныы полюһун олохтоохторо бэйэ-бэйэлэрин кытта санааларын үллэстэллэр.
Киин улуустар олохтоохторо -40 тымныы кыраадыска «тоҥнубут» диир буоллахтарына, өймөкөөннөр бу күннэргэ -65 кыраадыс тымныыны тулуйаллар…