Хаартыска -- Алексей Винокуров тиксэриитэ.
Быйыл Өймөкөөн улууһугар өтөрүнэн буолан ааспатах тымныы кыһын бэлиэтэннэ.
Ахсынньы ыйтан олунньуга диэри 50-60-кыраадыс тымныы турда. Уустук кыстык туһунан тыа хаһаайыстыбатын управлениетын салайааччыта Руслан Атласовы кытта кэпсэттибит.
— Быйылгы курдук ураты тымныы кыһын, мин өйдүүрбүнэн, 2005-2006 сылларга буолан ааспыта. Онон уустук кыстык сылгыны улаханнык “тэптэ”: оҕолооһун элбээтэ, аһыы туран охтуу бэлиэтэннэ. Онуоха эбии от хаачыстыбатын мөлтөҕө эмиэ эбиискэлэстэ. Научнай институт сир үлэтин салаатыгар оппутун чинчийтэрбиппитигэр, от хаачыстыбата быстар мөлтөҕүн бигэргэппиттэрэ. Күһүн убаһаны идэһэлээһин саҕана ыарахан кыстык иһэрэ биллибитэ. Олох көтөх этэ. Онон эрдэ дьаһана сатаабыппыт да, -58С тымныы өр кэмҥэ туран, дьон сылгыларын аһылыкка туруорбуттара. Онон сорох ыаллар кыстык бүтүүтүгэр отторо бүтэн, ыксыы сылдьыбыттара. Сылгы тымныыны 14 күн эрэ тулуйар. Онтон салгыы ыран, охтор аакка барар. Оту тиэйии үбүлээһинин олунньуга, кулун тутарга үстэ төхтөрүйэн оҥорбуппут. Көрбүт үптэрэ кыра буолан, суоппар көстүбэккэ, оту тиэйии бытааран ылбыта. Быйыл 80-ча сылгыны аҥардас адьырҕа кыыл тарта. Уопсайынан да, эһэ, бөрө үгүс сылгыны, табаны аһылык оҥосторо элбээтэ. Билигин этэҥҥэ күөххэ үктэннибит. Хайаан да быйылгы сайыҥҥа бэйэбит оттоон хаалыахпытын наада. Кэлии от наһаа айдааннаах. Хайдах хаачыстыбалаах от кэлэрэ биллибэт. Урулуоннаах от сытыйара чахчы булоллаҕа. Ол, биллэн турар, аймалҕаны таһаарар. Аны үбүлээһин кыра буолан, тиэйиитэ да эрэйдээх. Ону учуоттаан быйыл олох бэйэбитин бэйэбит оппутунан хааччыныахха наада. “Өймөкөөн” ХЭУо салайааччыта Мирон Егоров Томторго Лэглэкэ тыатын толоонугар сирин оҥостон, эбиэс ыһыахтаах. Учуонайдар сүбэлэринэн оҥоһулла сылдьар сир буолан, аны күһүн үүнүүнүн биэрэр ини диэн эрэллээхпит. Салгыы Биэрэк Үрдүгэр баар бааһыналары оҥорон, сиилэс ыһар былаан баар.
Быйыл окко от ыйын 5 күнүттэн тахсыы буолуоҕа. Икки эрэ нэдиэлэ оттообокко, атырдьах ыйа бүтүөр диэри оттуур сорук турар. Быйыл төһө сүөһүнү кыстыкка киллэрэрбитин ааҕан-суоттаан баран, сотору кэминэн от былаанын түһэриэхпит, — диэн быһаарда Руслан Михайлович.
Уус Алдан улууһун Бээди оскуолатын 2-с кылааһын үөрэнээччитэ Эрхан Захаров улахан киһилии хорсун быһыыны оҥорбут,…
Дойду бэрэсидьиэнэ Владимир Путин көҕүлээһининэн Саха сиригэр култуура сайдар. “Добро.рф ассоциацияҕа” киирэр “Култуура волонтердара” Бүтүн…
Уус Алдан улууһун Бороҕоннооҕу оҕо ускуустубатын оскуолатын материальнай-тиэхиньиичэскэй баазата биллэрдик хаҥаабыт. Дойду бэрэсидьиэнэ Владимир Путин…
Быйыл Арктика улуустарыгар Арктикатааҕы атыы-логистика хампаанньата олохтоох хаһаайыстыбалар үүннэрбит хаппыысталарын, сүбүөкүлэлэрин, моркуоптарын уонна хортуоппуйун киллэрэн…
ИДьМ Дьокуускайдааҕы 4-с нүөмэрдээх полиция салаатын дьуһуурунай чааһыгар, мэдиссиинэ тэрилтэтиттэн, куорат биир кыбартыыратыгар эр киһи…
Киһи кулгааҕа тыаһы, дорҕоону икки кулгааҕынан истэргэ аналлаах. Өскөтүн биир эрэ кулгаахха наушнигы кэтэн иһиттэххэ…