Б. дь. тохсунньу 17 күнүгэр өрөспүүбүлүкэтээҕи Олоҥхо Ыһыаҕын бэлэмигэр аналлаах улуус баһылыга Иннокентий Сивцев анал дьаһала тахсыбыта. Онно тустаах хамыыһыйалар чопчу бигэргэммиттэрэ.
11 ый устата өрөспүүбүлүкэ салалтатын кытта үбүлээһин боппуруоһун, култуура министиэристибэтин кытта тэрээһиҥҥэ олохтоох кэпсэтии, сүбэлэһии кэнниттэн, бары боппуруос үөһээ инстанцияларга быһаарыллыыта түмүктэнэн, бу күннэргэ улуус баһылыга Иннокентий Сивцев хамыыһыйалар салайааччыларын кытта нэһилиэктэринэн сылдьан олохтоохтору кытта сирэй көрсөн кэпсэттэ.
— Бары боппуруостары сиһилии ырыттыбыт. Ханнык нэһилиэктэр ханнык улуустары көрсөллөрүн быһаардыбыт. Онон бу күннэргэ нэһилиэктэр эппиэттээх улуустарын кытта ыкса сибээһи олохтуохтара. Ас-үөл боппуруоһун анал хамыыһыйалары кытта быһаарсыахтара, олохтоохтору кытта сүбэ мунньахтары ыытыахтара. Култуурунай тэрээһиннэргэ туспа сүбэ мунньахтар буолуохтара. Тымныы полюһугар ыытыллар Олоҥхо Ыһыаҕар быһа холуйан араас эрэгийиэннэртэн уонна улуустартан 10 тыһыынча кэриҥэ ыалдьыт кэлэр баҕатын биллэрдэ.
Бу күннэргэ аны улуус киинигэр Уус-Ньараҕа уонна Аартыкка көрсүһүүлэри тэрийиэхпит, — диэн улуус баһылыга Иннокентий Сивцев иһитиннэрдэ.
Хамыыһыйалар кэлэн барааттарын кытта нэһилиэк аайы олохтоохтор тэрээһиннээх үлэни саҕалаабытынан бардылар. Ол курдук, Өймөкөөн аатырбыт убаһатын этэ, куобаҕа, куһа, сугуна, үөрэ ото, дөлүһүөнэ нэһилиэк аайыттан хомуллан, Томторго кэлиэҕэ уонна Эбэ Хайатын муус хайатын хаспаҕар аны сайыҥҥа диэри хараллыаҕа.
Өймөкөөн улууһа баара-суоҕа 7 нэһилиэнньэлээх пууннаах. Санаан көрүҥ, 10 тыһыынча кэриҥэ ыалдьыты Олоҥхо Ыһыаҕар аҕыйах нэһилиэнньэлээх улуус көрсөөрү бэлэмнэниитэ хайҕаныах эрэ тустаах. Нэһилиэктэр актыыптарын кытта көрсүһүүгэ улуустарынан араарыы буолла. Улуус баһылыга Иннокентий Сивцев көрсүһүүлэргэ улуус салалтата былааннабыт үлэтин сиһилии быһааран биэрдэ.
Ол курдук, Томтор нэһилиэгин олохтоохторо бары Бүлүү бөлөх улуустарын ыалдьыттарын көрсүөхтэрэ. Бүгүҥҥү күҥҥэ улуус баһылыгын сырыытын кэнниттэн нэһилиэктэргэ тэрээһин мунньахтар буола тураллар. Онон ханнык улуустары ханнык нэһилиэктэр көрсөллөрүн, эппиэттээх оройуоннарын кытта туох сибээһи олохтуохтарын туһунан сиһилии билиһиннэриэхпит.
Оройуон баһылыга Иннокентий Сивцев дьонун санаатын көҕүлүүр инниттэн саха эстрадатын сулустарын Аскалон Павловы уонна Анастасия Готовцеваны нэһилиэк аайы илдьэ сылдьан кэнсиэрдэттэ.
Олохтоохтор босхо кэнсиэри көрөн, бэркэ сынньаннылар, баһылыктарыгар бэртээхэй дьоро киэһэлэри бэлэхтээбитигэр махтаннылар.
Ахсынньы 24 күнүгэр «Бриллианты Якутии» ансаамбыл 2025 сылы түмүктүүр аһаҕас уруогун үрдүк таһымнаахтык ыытта! [gallery…
Үөрэх тиһигин оптимизацията үөрэх хаамыытыгар хоромньуну оҥоруо суохтаах. Бу туһунан өрөспүүбүлүкэ баһылыга Айсен Николаев Ил…
Социальнай пуонда Саха сирнээҕи салаата иһитиннэрэринэн, биэнсийэни уонна оҕо босуобуйаларын Саҥа дьыл иннинэ эрдэ биэриэхтэрэ. …
Ю.П. Степанов аатынан инбэлииттэри чөлүгэр түһэрэр өрөспүүбүлүкэтээҕи кииҥҥэ 557 байыаннай дьайыы кыттыылааҕа уонна кинилэр дьиэ…
Аны сайын Кэбээйи улууһугар Олоҥхо ыһыаҕа ыытыллар. Ону көрсө Сииттэ оскуолатын таһыгар төрөппүттэр оҕолорун кытта…
Абый улууһун борокуруора оскуолаҕа уруокка эт-хаан эчэйиитин ылбыт оҕоҕо харчынан толуйууну төлөттө. 2014 сыллаахха төрөөбүт…