Өймөкөөҥҥө сир баайын туһанааччылара социальнай бырайыактарга кыттыахтара

Өймөкөөн оройуонун социальнай-экэнэмиичэскэй сайдыытыгар туһуламмыт бырайыактарга сир баайын туһанааччыларын кыттыыларын улаатыннарар наадатын туһунан Ил Дархан Айсен Николаев бырамыысыланнай тэрилтэлэр салайааччыларын кытта көрсүһүүгэ иһитиннэрдэ.

Сүбэ мунньах ыам ыйын 16 күнүгэр, бээтинсэҕэ, Уус-Ньараҕа Ил Дархан оробуочай командировкатын чэрчитинэн ыытылынна.

Өймөкөөн улууһа — көмүһү хостооһуҥҥа лидердэртэн биирдэстэрэ, уопсай саппааһа — 154 туонна. Оройуоҥҥэ маны таһынан үрүҥ көмүс, сурьма, хорҕолдьун уонна тутуу матырыйааллара бааллар. Манна 46 хампаанньа үлэлиир.

«Көмүһү хостооһуну сайыннарыыга Саха сирэ бүгүн дойду иккис эрэгийиэнинэн буолар. Былырыын 55 туонна көмүһү хостообут. Биһиги чугастааҕы сылларга хостооһун кээмэйэ оннунан хаалбакка, улаатар туһугар үлэлиэхтээхпит. Бу өрөспүүбүлүкэҕэ эрэ буолбакка, уопсайынан, дойдуга судургута суох кэмҥэ улахан суолталаах. Көмүһү хостуур бырамыысыланнас историята сайдыылаах, улуустар, ол иһигэр Өймөкөөн улууһа улахан кылааты киллэрэллэр», – диэтэ Айсен Николаев. Сиһилии манна аах.