Өймөкөөҥҥө ситэриилээх былаас отчуотун сэргээтилэр

Бу күннэргэ Өймөкөөн улууһугар ситэриилээх былаас нэһилиэнньэҕэ отчуота түмүктэннэ. 

Түөрт күнү быһа бырабыыталыстыба икки оробуочай бөлөҕө улуус сэттэ муниципальнай тэриллиилэригэр сылдьан, 2022 сыллаах үлэ түмүгүн билиһиннэрдэ. Хас биирдии оробуочай бөһүөлэккэ уонна нэһилиэккэ кулууптарга толору дьон кэллэ.

Бу —  дьон бырабыыталыстыбаҕа итэҕэлин, өрөспүүбүүкэ салалтатын ыытар үлэтэ биһиринэрин туоһута. Холобура, Уус-Ньараҕа уонна Төрүккэ хаһан да маннык элбэх киһи мустубутун биир бэйэм көрө илигим.

Улуус киинигэр  оройуон Мунньаҕын дьокутааттара ох курдук бэлэмнэнэн кэлэн, Уус-Ньара бөһүөлэгэ сайдыытыгар сыһыаннаах  бэрт үгүс ыйытыыны биэрдилэр. Онно толору хоруйу ылан, оройуон  Мунньаҕын дьокутааттарын саҥа састааба сүбэ-ама,  өйөбүл ылан, мантан инньэ тахсыылаахтык үлэлииллэригэр «күөх уот» умайда.

Нэһилиэк аайы туруорсар боппуруостара кэскиллээх буолан, өрүттэр — олохтоохтор да, ситэриилээх былаас уорганнарын бэрэстэбиитэллэрэ да, икки өттүттэн бэрт дириҥ ис хоһоонноох кэпсэтииттэн дуоһуйдулар, кэскиллээххэ сирдиир бииргэ үлэлээһин толкуйугар кэллилэр.

Төрүккэ олохторун хорук тымырын — суол оҥоһуутун киэҥник ырыттылар. «Халыма» федеральнай суолтан тардыылаах буолан, Төрүттүүр суолу оҥоруу өрөспүүбүлүкэттэн эбэтэр федеральнай киинтэн быһаарылларын үөрэтиэхтэрэ.

Үчүгэй нэһилиэгэр айылҕаны харыстааһын, экология боппуруостарыгар ситэриилээх былаас болҕомтотун туһаайан, олохтоохтор туруорсар боппуруостара сотору кэминэн ситиһиилээх буоларыгар эрэли үөскэттэ.

Сордоҥноох нэһилиэгиттэн улуус  Мунньаҕын дьокутаата Татьяна Готовцева ыччаты тыа сиригэр олохсутууга, каадырдары бэлэмнээһиҥҥэ, кинилэри үлэнэн хааччыйыыга тус санаатын, көрүүтүн  бырабыыталыстыба уонна улуус бас-көс салайааччыларыгар этиитин тиэрдиитэ, мунньах кыттыылаахтарын барыбыт болҕомтотун тарта.

Өймөкөөн орто оскуолатын учуутала Альбина Алексеева кэргэнэ аатырбыт Өймөкөөн  күн-дьыл туругун бэлиэтиир  ыстаансыйаҕа үлэлиирин этэн туран, «Саха сирин брендинэн буолбут Өймөкөөн бытархан тымныыта болҕомтоҕо ылыллан, Арктика улуустарын ахсааннарыгар кыайан киирбэппитинэн сибээстээн, Өймөкөөн улууһун тыйыс услуобуйатын учуоттаан, «Тымныы оройо» диэн статуһу иҥэрэн, кэккэ чэпчэтиилэр көрөргүтүгэр» диэн санаатын тиэртэ.

Мин ситэриилээх былаас Өймөкөөн улууһугар түмүктэнэн эрдэҕинэ, оробуочай бөлөх салайааччыта Сергей Местниковтан бэйэтин санаатын үллэстэригэр көрдөстүм.

Ити курдук, Өймөкөөн улууһун олохтоохторо бырабыыталыстыба отчуоттуур бөлөҕүн кытта атах тэпсэн олорон, олох-дьаһах араас салааларын  бары боппуруостарын таарыйан, сарсыҥҥылаах бырайыактары түстүүргэ, сонун сүүрээни тобуларга бэрт кэскиллээх толкуйга киирэн мунньахтары түмүктээтилэр.

Ол ону хас биирдии нэһилиэккэ олохтоохтор ситэриилээх былаас отчуотун кыттыылаахтарын кытта уопсай хаартыскаҕа түһүүлэрэ уонна «уруйунан-айхалынан» түмүктүүллэрэ туоһулуур.