Өймөкөөҥҥө суоллары чөлүгэр түһэрэллэр

Өймөкөөн улууһугар ардах халааныттан эмсэҕэлээбит суоллары чөлүгэр түһэрии үлэлэрэ салҕаналлар. Бу туһунан брифиҥҥэ Тырааныспарга уонна суол хаһаайыстыбатыгар миниистири бастакы солбуйааччы Анатолий Потапов иһитиннэрдэ.

«Ардах халаанын түмүгэр Өймөкөөн улууһугар эрэгийиэннээҕи суолталаах «Өймөкөөн»  трассаҕа 30 учаастак алдьаммыта быһаарылынна. Олортон 14 учаастак суол 56-с км — 156-с км учаастагар баар. Бу учаастакка биһиги «ДЭП-132» ХЭТ бэдэрээтчит тэрилтэбит номнуо үлэни ыытан, Томтор сэлиэнньэтигэр диэри айаны хааччыйда. 156-с км — 177-с км учаастактарга 16 учаастак алдьаммыта быһаарылынна. Бүгүҥҥү күҥҥэ «ДЭП-132» ХЭТ бэдэрээтчит тэрилтэ, ону таһынан «Транстройсаха» ХЭТ чөлүгэр түһэрии үлэтин саҕалаатылар уонна Сордоҥноох диэки баран иһэллэр», — диэн Потапов иһитиннэрдэ.

Суол суураллыыта Томтор уонна Куйдуһун ыккардыларыгар  сапыраапкалыыр ыстаансыйаҕа диэри эмиэ бэлиэтэннэ. Бу учаастакка быстах кэмҥэ эргийэр суол тэрилиннэ, үлэни чугастааҕы кэмҥэ түмүктүүр былааннанар.

«Өймөкөөн сэлиэнньэтигэр диэри эмиэ суураллыбыт учаастактар бааллар – бу Томтор уонна Өймөкөөн ыккардыгар, 50-ча килэмиэтир усталаах сиргэ суол 21 учаастага алдьаммыт. Бүгүҥҥү күҥҥэ «ИП Гарифулина М.В.» бэдэрээтчит тэрилтэ икки өттүттэн Өймөкөөн уонна Томтор өттүлэриттэн үлэҕэ турунна. Бүгүн чөлүгэр түһэрии үлэлэрэ салҕаналлар уонна субуотаҕа диэри Өймөкөөҥҥө диэри быстах кэминээҕи айаны арыйыахпыт, ол аата аһы-үөлү, бастакы наадалаах табаардары, ону таһынан ууга барбыт дьиэлэри чөлүгэр түһэрэргэ анаан биһиги улуустарбытыттан барар биригээдэлэри тиэрдэр наадаттан», — диэн Потапов эттэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.