Өймөкөөҥҥө сүппүт киһи көстүбүт

Атырдьах ыйын 29 күнүгэр 1962 с.т. эр киһи Уус Ньараттан хонууга үлэлии барбыт. Соҕотох эбит. «Шерп» вездеходунан айаннаабыт.

Атырдьах ыйын 30  күнүгэр аймахтарыгар төлөпүөннээн төттөрү баран эрэрин туһунан эппит. Кэпсэтэ турдахтарына, сибээстэрэ быстан хаалбыт. Итинтэн салгыы сибээс сүппүт, кыайан кэпсэппэтэхтэр.

Бу туһунан иһитиннэрии Өймөкөөн улууһугар ЕДДС балаҕан ыйын 2 күнүгэр киэһээ киирбит. Балаҕан ыйын 4 күнүгэр бу киһини көрдүү анал тырааныспарынан үс киһи барбыт — ыытааччы, миэдик уонна ЕДДС начаалынньыга. Сүппүт киһи кэнники сибээстэспит эрэ сирэ биллэр эбит. Спутниковай төлөпүөнтэн хантан кэпсэппитин билбиттэр.

Бэҕэһээ, балаҕан ыйын 4 күнүгэр, көрдүүр бөлөх ол киһи кэпсэппит сириттэн 20  км сиргэ хонордуу тохтообут. Бүгүн сарсыардаттан көрдөөһүннэрин саҕалаабыттар. Онно суол-иис суоҕунан, айаннара уһун. Ол кэмҥэ сүппүт киһи дьону бэйэтэ булан тахсан кэллэ диэн иһитиннэрбиттэр.

Биллибитинэн, тиэхиньикэтэ алдьаммытын кэнниттэн, бу киһи бэйэтэ федеральнай айан суолугар диэри барарга быһаарыммыт. Онно саамай кылгас суолу талбыт. Кини үөрүйэхтээх киһи буолан, айаҥҥа сылаас таҥаһы-сабы, балаакканы, аһы-үөлү, эрэһиинэ оҥочону куруук илдьэ сылдьар эбит. Уунан бардаҕына айан суолугар тахсарын билэр буолан оҥочоломмут. Итинник хас да күн айаннаан, дьоҥҥо тиийэн кэлбит.

— Кини айылҕаҕа сылдьа үөрэммит буолан, уустук балаһыанньаттан тахсыбыт. Ол гынан баран маннык айан сэрэхтээх. Өскөтүн ыксаллаах уонна уустук балаһыанньаҕа түбэстэххэ, тохтообут сиртэн барбакка көмөнү кэтэһэр ордук. Көмө хайаан да оҥоһуллар, — диэн СӨ Быыһыыр сулууспатыттан иһитиннэрэллэр.