Өймөкөөҥҥө теплоэнергетиктар ититии ситимин чөлүгэр түһэрэллэр

«Теплоэнергосервис» АУо генеральнай дириэктэрэ Максим Трофимов Өймөкөөн улууһугар оробуочай сырыытын кэмигэр уу ылбыт кээмэйин уонна сылааһынан хааччыйыы систиэмэтэ эмсэҕэлээбит сирин-уотун сыаналаата.

Хампаанньа исписэлиистэрэ Өймөкөөн, Бэрэ-Үрдэ, Сордоҥноох уонна Уус-Ньара («Нерскэй» микрооройуон) сэлиэнньэлэригэр сылаас ситимнэрин көрүүгэ-истиигэ уонна чөлүгэр түһэриигэ үлэлииллэр. Энергетиктар эмсэҕэлээбит нэһилиэнньэлээх пууннарга суол-иис сырыытын түргэнник чөлүгэр түһэрэргэ көмөлөһөн, суоллары ыраастыырга уонна ууга барбыт сирдэри босхолооһуҥҥа көхтөөхтүк кытталлар, диэн «Теплоэнергосервис» АУо пресс-сулууспата иһитиннэрэр.

Ураты болҕомто ууга барбыт «Нерскэй» хочуолунай чоҕун былаһааккатыгар, Уус Ньараҕа баар водоканал подстанциятыгар, ону таһынан Бэрэ-Үрдэ уонна Өймөкөөн сэлиэнньэлэрин сылаас ситимнэригэр ууруллар. Уу таһыма түспүтүн кэннэ исписэлиистэр систиэмэлэр куттала суох уонна эрэбиллээх буолууларын хааччыйар туһугар оттугу куурдуунан уонна электро-тэрили бэрэбиэркэлээһининэн дьарыктаныахтара.

Өймөкөөннөөҕү филиал ыскылааттарыгар наадалаах матырыйааллар баалларын уонна хамаанда түмсүүлээх үлэтин түмүгэр чөлүгэр түһэрэр үлэлэри кылгас кэм иһигэр түмүктүүр былааннанар. Бу кэлэр оттук сезонугар бэлэмнэниини харгыһа суох салгыырга кыаҕы биэриэҕэ. «Өймөкөөннөөҕү филиалга сылаас ситимнэрин түргэнник чөлүгэр түһэрэр туһуттан бары тиэхиньиичэскэй кыамталар уонна үрдүк квалификациялаах каадырдар түмүлүннүлэр. Сылааһынан бигэтик хааччыйыы – бу көннөрү сорук буолбатах, бу олоххо-дьаһахха наадалаах ирдэбил, ордук Өймөкөөн тыйыс усулуобуйатыгар. Онон биһиги кэлэр оттук сезонугар бэлэмнэниигэ болҕомтобутун уурар туһугар ситимнэри түргэнник чөлүгэр түһэриигэ кимнээҕэр да интэриэстээхпит», – диэн «Теплоэнергосервис» АУо генеральнай дириэктэрэ Максим Трофимов эттэ.

Хампаанньа улуус дьаһалтатыгар уонна олохтоохторугар халаан содулун туоратыыга өйдөһүү, өйөбүл уонна бииргэ үлэлэһии иһин махтал тылларын тиэрдэр.