Өймөкөөҥҥө тобохтору көҥүлэ суох сиргэ куппуттар

Социальнай ситимнэринэн селитраны көҥүлэ суох сиргэ тоҕоллорун туһунан видео тарҕанна. 

Бу түбэлтэ Өймөкөөн улууһун Уус Ньара бөһүөлэк чугаһыгар бэлиэтэммит. Экологияҕа министиэристибэтэ ТГ-ханаалыгар иһитиннэрбитинэн, бу түбэлтэ ураты хонтуруолга сылдьар.

«Экология министиэристибэтэ Өймөкөөн оройуонугар бэлиэтэммит сокуоннайа суох убаҕас бытовой тобоҕу тоҕуу дьыалата ураты хонтуруолга ылылынна. Өймөкөөннөөҕү судаарыстыбаннай экологическай надзор инспекциятын инспектордара билигин миэстэтигэр үлэлииллэр. Видео ааптарын кытта тахсыбыт түбэлтэни быһаарыыга үлэ барар. Госавтоинспекция отделын нөҥүө инспектордар ыйытыыларынан тырааныспар хаһаайына билиннэ»,-диэн Экологияҕа министиэристибэтин пресс-сулууспата иһитиннэрэр.

Биэдэмистибэҕэ видеоҕа уһуллубут тырааныспар тоҕор тобохторун кээмэйэ уонча туоннанан сабаҕаланар. Бэрэбиэркэ түмүгүнэн административнай сокуону кэһии тахсыбыт түбэлтэ чахчыта быһаарылыннаҕына, буруйдааҕы эппиэтинэскэ тардыыга бары туһааннаах үлэ ыытыллыаҕа.