Өймөкөөҥҥө Тымныы полюһун бэстибээлигэр Панда Саха уонна Далаана ыалдьыттыахтара

Ханнык баҕарар улахан тэрээһиҥҥэ үгэс быһыытынан ыалдьыттарынан биллиилээх артыыстар, ырыаһыттар, киинэ дьоруойдара буолаллар. 

Быйылгы «Тымныы полюһугар айан» бэстибээл ыалдьыттарынан кимнээх буолалларын туһунан Өймөкөөн улууһун Томтор нэһилиэгин баһылыгын солбуйааччы Айаал Неустроев билиһиннэрдэ:

— Барыта 100-тэн тахса тэриллиилээх турист ыалдьыт быһыытынан кэлэрин күүтэбит. Кэпсэтиини эрдэттэн ыытан, нэһилиэк олохтоохторун ыалдьыт дьиэлэрэ кинилэри көрсөргө бэлэмнэр. Быйыл Өймөкөөн оройуонун олохтоохторо  Саха сирин биллэр-көстөр “сулустарын” күүтэбит. “Тымныы полюһугар айан-2025” бэстибээлгэ биллиилээх блогер Вячеслав Романов-Панда Саха кэлиэҕэ. Тыа сирин учуутал-блогера 15 мөлүйүөнтэн тахса аан дойду араас муннуктарыттан сурутааччылаах. Кини видеолара мөлүйүөнүнэн көрөөччүлэри түмэр. Маны тэҥэ, СӨ үтүөлээх артыыһа, “Этигэн Хомус” музыкальнай бириэмийэтин түөрт төгүллээх лауреата, саха эстрадатын сулуһа Наталья Кривошапкина-Далаана кэнсиэригэр кини талааныгар сүгүрүйээччилэри түмүөҕэ. 

Онон олохтоохторго уонна туристарга дьон өйүгэр-санаатыгар үйэлэргэ хаалбыт Өймөкөөн сиригэр ыытыллыбыт Олоҥхо Ыһыаҕын тэҥэ, быйылгы бэстибээл эмиэ умнуллубат түгэннэри бэлэхтиэҕэ.