Өймөкөөҥҥө үс улуус биригээдэлэрэ үлэлииллэр

Сайыҥҥы халаантан эмсэҕэлээбит Өймөкөөн сэлиэнньэтигэр Сунтаар, Ньурба уонна Горнай улуустарыттан тутуу биригээдэлэрэ кэллилэр. Чөлүгэр түһэрии үлэтигэр уопсайа 25 исписэлиис кыттар. Бу туһунан Экология, айылҕаны туһаныы уонна ойуур хаһаайыстыбатын министиэристибэтин уу сыһыаннаһыыларыгар департаменын салайааччыта Анисия Игнатьева брифинг кэмигэр иһитиннэрдэ.

Кини этэринэн, хамыыһыйалар олорор дьиэлэри салгыы бэрэбиэркэлииллэр, халаантан тахсыбыт хоромньу кээмэйин быһаараллар. Өймөкөөн уонна Томтор-Өймөкөөн трассаларыгар суһаллык чөлүгэр түһэрии үлэтэ бара турар. Бүгүҥҥү күҥҥэ Өймөкөөҥҥө оптоволокно сибээс линиятын быстыбыт түөрт учаастага  өрөмүөннэммит.

«Судаарыстыбаннай өҥөлөр биир кэлим порталларыгар биирдэ бэриллэр материальнай көмөҕө уонна баайы-дуолу сүтэриинэн үбүнэн көмөҕө сайабылыанньалары ылыы салҕанар. Бүгүҥҥү туругунан, уопсайа 1882 сайабылыанньа киирдэ, ол иһигэр биирдэ бэриллэр материальнай көмөҕө 1350 уонна үбүнэн көмөҕө 532 сайаапка киирдэ. 145 киһиэхэ 2 мөлүйүөн 840 тыһ. солк. ыытылынна», — диэн кини эттэ.

Кэнники дааннайдарынан, Өймөкөөн уонна Абый улуустарыгар сайыҥҥы халаан түмүгэр 1387 киһи олорор 382 тиэргэн ууга барда. 124 олорор дьиэ, биир доруобуйа харыстабылын эбийиэгэ – Өймөкөөн нэһилиэгэр балыыһа, уон ОДьКХ эбийиэгэ, улуус уонна муниципальнай суоллар 72 учаастактара, 13 муоста, биэс сибээс эбийиэгэ уонна биир култуурунай эбийиэк – Уус-Наратааҕы кыраайы үөрэтэр түмэл дьиэтэ алдьаммыттар.

Сиһилии: https://www.sakha.gov.ru/news/8942