Өймөкөөҥҥө ыытыллар Олоҥхо ыһыаҕын эбийиэктэрин тутуу түмүктүүр биэтэккэ чугаһаата

Бэҕэһээ Өймөкөөн улууһугар от ыйын 1 уонна 2 күннэригэр ыытыллар Олоҥхо ыһыаҕар бэлэмнэниини көрөр-истэр соруктаах Томтор нэһилиэгэр бырабыыталыстыба оробуочай бөлөҕө үлэлээтэ.

Хамыыһыйаны СӨ Бырабыыталыстыбатын Бэрэссэдээтэлин солбуйааччы Сергей Местников салайан илдьэ сырытта. Оробуочай бөлөх састаабыгар СӨ култуура уонна духуобунас сайдыытын миниистирин 1-кы солбуйааччыта, Олоҥхо ыһыаҕар бэлэмнэнии тэрийэр кэмитиэтин култуурунай чааһыгар эппиэттээх  Афанасий Ноев, Предпринимательство, эргиэн уонна туризм миниистирин солбуйааччы, тэрийэр кэмитиэт атыы-эргиэн уонна аһынан-үөлүнэн хааччыйыы боппуруостарыгар хамыыһыйа салайааччыта Максим Прокопьев, тутуу миниистирэ Павел Кылатчанов, култуурунай тэрээһиннэргэ эппиэттээх “Олоҥхо” тыйаатырын дириэктэрэ Мария Турантаева,  «Уран» дизайн-устуудьуйа ХЭУо генеральнай дириэктэрэ Вячеслав Яроев бааллар. Оробуочай бөлөҕү кытта оройуоннааҕы тэрийэр кэмитиэт салайааччыта, улуус баһылыгын э.т. Александр Иванов, улуус дьаһалтатын эппиэттээх үлэһиттэрэ, нэһилиэктэр баһылыктара сырыттылар.

Бырабыыталыстыба хамыыһыйатын үлэтин туһунан СӨ култуура уонна духуобунас сайдыытын миниистирин 1-кы солбуйааччыта, Олоҥхо ыһыаҕар бэлэмнэнии тэрийэр кэмитиэтин култуурунай чааһыгар эппиэттээх  Афанасий Ноев бу курдук сырдатта:

— Өрөспүүбүлүкэтээҕи Олоҥхо ыһыаҕын тэрийэр кэмитиэтин чилиэннэрэ уонна Өймөкөөн улууһун салалтата үлэ хаамыытын билсиини Аал Луук Маһы тутар биригээдэттэн саҕалаатыбыт.

 

Манна «Уран» дизайн-устуудьуйа ХЭУо генеральнай дириэктэрэ Вячеслав Яроев хамаандата үлэлии сылдьар. Тутуу биригээдэтэ Олоҥхо ыһыаҕын сүрүн эбийиэгин тутан бүтэрэн эрэр.  Аал Луук Мас аллараа өттүгэр таас билиитэнэн киэргэтии оҥоһуллара хаалбыт.

Күнү көрсөр сиргэ сэргэни туруоруу, күрүө оҥоһуллара хаалбыт. Туос ураһа тутуутун кэлэр нэдиэлэҕэ бүтэриэхтээхтэр.

Оҕолор олоҥхолуур балаҕаннарын сүрүн үлэтэ бүппүт.

Тутуу биригээдэтэ аны ис-тас үлэни оҥороро хаалбыт.

Көмүс күрүөҕэ Лапландия Санта Клауһа резиденциялээх эбит. Олоҥхо ыһыаҕын кэмигэр бу дьиэҕэ дьыалабыай кэпсэтиилэр, көрсүһүүлэр буолуохтара. Онон саҥардыллан, кырааскаланара эрэ хаалбыт.

Ипподром үлэтэ эмиэ түмүктэнэн эрэр. Манна олохтоох дьон биригээдэлэрэ дьон олорор тырыбынатын бүтэрбит. Аны күрүө-хаһаа оҥоуллара хаалбыт. 

Улуус салататын, олохтоох тэрийэр хамыыһыйаны, тэрилтэ салайааччыларын, нэһилиэктэр баһылыктарын уонна уопсастыбаннаһы кытта көрсүһүүтүгэр Бырабыыталыстыба бэрэссэдээтэлин солбуйааччы Сергей Местников Олоҥхо ыһыаҕын эбийиэктэрэ тутуллан, бэс ыйын 20-тин диэки  тутуу биригээдэлэрэ үлэни түмүктүүр биэтэккэ чугаһыппыттарын анаан бэлиэтээтэ.

 

Бэс ыйын 21 күнүттэн аны «Көмүс күрүөҕэ» култуура эйгэтин үлэһиттэрэ  бэлэмнэнии үлэтин ыытыахтара. Онон тустаах кыраапыкка сөп түбэһиннэрэн, сөптөөх үлэ баран иһэрэ хайҕаллаах суол.  Салайааччылар мунньахтарыгар болҕомтону сүрүннээн айан суолугар-ииһигэр туһаайдылар.

Муосталары бөҕөргөтүүгэ , аара суоллааҕы бэлиэлэри бэрэбиэркэлииргэ, быһата, ыраах айаҥҥа куттал суох буоларын ситиһии тула кэпсэтии барда. 

Ыалдьыттар түһэр «Балаакка куораттара» (палаточный городок) сиригэр-уотугар уот тардыллыыта, хорчуопка боппуруоһун эмиэ сиһилии ырытыы буолла. 

Мэдиссиинэ хамыыһыйата санитарнай авиация боппуроһуттан саҕалаан, эмигэр-томугар тиийэ быһааран олорор эбит. Дьон аһыырыгар эппиэттээх хамыыһыйа салайааччыта Максим Прокопьев олохтоох 100-тэн тахса урбаанньыттан аһылыгынан хааччыйыыга сайаапка киирбитин иһитиннэрдэ. Томтор орто оскуолатын куукунатыгар Олоҥхо Ыһыаҕын ыалдьыттарын үс сиринэн  аһатар кыаҕы тэрийэр инниттэн, улахан кыамталаах ас астыыр тэрили таҥыахтара. 

«Саха» НКИХ  Тымныы полюһугар ыытыллар ыһыаҕы өрөспүүблүкэ олохтоохторугар быһа эпииринэн көрдөрөр боппуруоһа быһаарыллыбыт. 

Ыччат министиэристибэтэ волонтердар боппуруостарыгар үлэлэһэ сылдьар. Бу салааҕа тустаах тэрээһин үлэтэ эмиэ барар. 

Онон Олоҥхо ыһыаҕар бэлэмнэниини миэстэтигэр тиийэн көрөн-истэн баран, СӨ Бырабыыталыстыбатын Бэрэссэдээтэлин солбуйааччы Сергей Местников  бары салааҕа бэлэмҥэ үчүгэй сыанабылы биэрдэ.