Өймөкөөннөр сунтаардарга махталлара сүҥкэн!

Соторутааҕыта Өймөкөөҥҥө өрөспүүбүлүкэ тустаах министиэристибэлэрин эппиэттээх салайааччылара нэһилиэнньэни кытта көрсүбүттэрэ.  

Мунньахха Өймөкөөн орто оскуолатын бэтэрээн-учуутала  Ирина Сивцева халаан уустук кэмигэр суһал көмөнү оҥоро сылдьар араас улуус биригээдэлэригэр махталын биллэрбитэ.  Олор истэригэр кини сунтаардары тоһоҕолоон маннык бэлиэтээбитэ: «Бу күннэргэ биһиги нэһилиэкпитигэр сунтаардар олох былдьаһыкка сырыттылар. Бу биригээдэ олус таһаарыылаахтык үлэлээтэ.  Мин биир дойдулаахтарбынан  киэн туттабын!».

Сунтаар улууһуттан Өймөкөөҥҥө тиийбит волонтердар тустарынан улуус хаһыаттарын көхтөөх уопсастыбаннай кэрэспэдьиэнэ Тамара Винокурова бу курдук санаатын үллэһиннэ:

— Учуутал бу этиитигэр  мустубут дьон бары биир киһи курдук сөбүлэспиттэрэ.  Кырдьык, бу күннэргэ  «сунтаардар бүгүн кимнээххэ бардылар?», «сунтаардартан ыйытыахха наада», «сунтаардар билэллэрэ буолуо…» эрэ диэн кэпсэтэбит нэһилиэк олохтоохторо бэйэбит икки ардыбытыгар. Бу дьон-сэргэ улахан сыанабыла буолар дии саныыбын.  Бэйэм түбэһэ түһэн, кинилэри 4 ыалга үлэлии сылдьалларын кэтээн көрбүтүм.  Уопсайа хас эбийиэккэ сылдьыбыттарын чопчулаан этэр кыаҕым суох. Ол гынан баран, Олоҥхо дойдута Сунтаар туруу үлэһит уолаттара көмөлөспүт ыалларыгар барыларыгар үтүө өйдөбүлү хаалларбыттара саарбаҕа суох. Биригээдэни Алквиад Иванов аатынан олимпийскай эрэллэри бэлэмниир успуорт оскуолатын дириэктэрин солбуйааччы Семен Павлов сатабыллаахтык салайан илдьэ сырытта. Мин бииргэ устудьуоннаабыт, билигин Сунтаар улууһугар олорор дьүөгэлэрбиттэн  кини аатырбыт, ааттаа-суоллаах  ситиһиилээх тустуукпут Лев Павлов аҕата буоларын билбитим. Нөҥүө күнүгэр «Семен Андреевич, эн Лев Павлов аҕата, олох сулус киһи кэлэ сылдьар эбиккин дии?», — диэбиппэр, чөмпүйүөн аҕата, саха эр киһитин сиэринэн, саҥата суох сэмэйдик мичээрдээн кэбиспитэ.

Бу биригээдэ олохтоох интэринээккэ түһэн, онно хонон, миэстэтигэр аһаан сырыттылар.  Кинилэри кытта күн аайы ыкса алтыспыт уопуттаах асчыттар Любовь Кондакова, Валентина Готовцева санааларын маннык эттилэр: «Сунтаардар олус түргэн-тарҕан хамсаныылаах, сатабыллаах үлэһиттэр дьон эбит. Көмөлөрүн сэргэ дьиэ туттарга бэрт элбэх туһалаах сүбэни-аманы биэрдилэр.  Биһиги кинилэргэ ис сүрэхтэн кыһаллан туран астаатыбыт.  Сүрдээх элэккэй, кэпсэтинньэҥ дьон буолан, хас аһаатахтарын аайы үөрүүлэрэ махталлара хара баһаам. Бу биһиэхэ саамай үчүгэй хайҕал буоллаҕа. Киһи өссө кыһаллан туран астыан, дьону тоторуон бакарар. Саха уолаттара быырпахтарын ахтан, бэйэлэрэ олус минньигэс быырпах оҥостон испиттэрэ, биһигин  күндүлээбиттэрэ». Өймөкөөн олохтоохторо сунтаардар тустарынан өссө да уһуннук ахта-саныы сылдьыахтара. 

… Дьэ, ити курдук Сунтаар улууһуттан сылдьар тутааччылар Өймөкөөн нэһилиэгин олохтоохторугар олус бэрт өйдөбүлү, хаһан да умнуллубат үтүөнү оҥорон бардылар. Кинилэр нэһилиэк олохтоохторугар ааттарын суруйан туран, бэйэлэрин улуустарын былааҕын бэлэхтээн бардылар.

Биллэн турар, бу былаах нэһилиэк түмэлигэр бэлиэ өйдөбүнньүк буолан туруоҕа.  Кинилэргэ бүгүҥҥүлэрин курдук дьон-сэргэ уйгулаах олоҕо тупсарын туһугар кыһалла сылдьар санааларын ыһыктыбаттарыгар, өрүү махтал тылларын истэ сылдьалларыгар баҕарабыт!