Өймөкөөннөр ууга сытар оту хостоон оттоон эрэллэр

Бу күннэргэ халаан уутуттан улаханнык эмсэҕэлээбит  Өймөкөөн улууһугар айылҕа иэдээнин содулун туоратар үлэ тэтимнээхтик ыытыллар.

Улууска бырабыыталыстыба чилиэннэрэ састааптаах анал хамыыһыйалар кэлэн үлэлии сылдьаллар. Айылҕа иэдээниттэн эмсэҕэлээбит нэһилиэктэринэн миэстэтигэр үлэлии сылдьар улуус баһылыгын 1-кы солбуйааччы Алексей Федотов иһитиннэрбитинэн, улуус  суһал ыстаабыттан үлэлии сылдьар хамыыһыйа  бырабыыталыстыба чилиэннэриттэн турар анал бөлөхтөрү кытта бииргэ үгүс тэрээһиннээх үлэни ыытар.

— Бу күннэргэ улууска  СӨ Тыа хаһаайыстыбатын министиэристибэтин исписэлиистэрин бөлөҕө ходуһалар туруктарын быһаарар инниттэн, Томтор, Сордоҥноох, Биэрэк Үрдэ, Хара Тумул, Өймөкөөн нэһилиэктэринэн сылдьан, халаан таһаарбыт хоромньутун ааҕаллар, үөрэтэллэр. Бу суолталаах үлэ кэнниттэн төһө кээмэйдээх көмө оҥоһуллара быһаарылыаҕа.  Быйыл улууска оттооһун былаана 3660 туонна этэ. Ол эрээри бүгүҥҥү күҥҥэ, күн дьыл туран биэрдэҕинэ,  улуус олохтоохторо миэстэтигэр 600 туонна эрэ оту хомуйуохтарын сөп.  Сүөһү кыстыырыгар Өймөкөөн улууһугар быһа холуйан 2200 туонна от, 100 туонна комбикорм, 120-тэн тахса туонна эбиэс наада. Бу боппуруос кытаанах хонтуруолга турар, — диэн бэлиэтээтэ оройуон баһылыгын бастакы солбуйааччыта Алексей Федотов.

Улуустааҕы Тыа хаһаайыстыбатын управлениетын салайааччыта Инна Яковлева иһитиннэрбитинэн, бэҕэһээ министиэристибэ исписэлиистэриттэн уонна улуустааҕы суһал ыстаап чилиэннэриттэн турар хамыыһыйа Өймөкөөҥҥө, Хара Тумулга, Биэрэк Үрдүн  уонна бүгүн Сордоҥноох нэһилиэктэригэр сылдьан хотоннору, ходуһалары үөрэттилэр, аакталары толордулар.

—  Сордоҥноох нэһилиэгэр сылдьан, 4 хотон ууга барбытын докумуоннаатыбыт. Ходуһа барыта ууга сытар.

Ол да буоллар, кураан күнү баттаһан, түөрт моой отчут ууттан хостоон оттоон эрэллэрин көрүстүбүт. Улууска бөдөҥ хааайыстыбалаах Михаил Винокуров оттуур ходуһатыгар бэйэтэ хоруу хаһан, уутун ыыта сылдьар. Сордоҥноох эҥээр суол оҥоһулуннар эрэ,  атын моой отчуттар эмиэ ууттан хостоон оттуу сатыыр былааннаахтар. Үгүстэр хотоннорун бэйэлэрин күүстэринэн өрөмүөннээн эрэллэр. «Үлэһит илии тиийбэт» диэн эбии көмө көрдүүллэр. Онон сотору кэминэн  олохтоохтор устудьуоннар этэрээттэрэ тиийэрин эрэнэ кэтэһэллэр. 

Бу күннэргэ биэдэмистибэлэр икки ардыларынааҕы хамыыһыйа ирдэнэр бары  докумуону толорбутун кэннэ, быйылгы кыстыкка төһө ынах сүөһү киирэрин ааҕан-суоттаан баран, тустаах көмө оҥоһуллан барыаҕа, — диэн бэлиэтээтэ Улуустааҕы Тыа хаһаайыстыбатын управлениетын салайааччыта Инна Яковлева.