Екклесиаста уонна Шестопсалмие кинигэлэрэ сахалыы саҥардылар

Бэс ыйын 30 күнүгэр СӨ Национальнай бибилэтиэкэтигэр киһи аймах историятын икки саамай былыргы айымньыта – Екклесиаста уонна Шестопсалмие тылбаастанан тахсыбыттарын биһирэбилэ буолан ааста.

Кинигэлэри Дьокуускайдааҕы уонна Ленскэйдэээҕи епархиялар төрүттэммиттэрэ 155 сылыгар анаан Саргылаана Леонтьева салайыытынан Саха сиринээҕи епархия тылбааһын салаата сахалыы оҥорон таһаарда. Бүгүн үөрүүлээх тэрээһиҥҥэ бибилэтиэкэ историческай саалатыгар  толору киһи мустубут.

Биһирэбил тэрээһинин Дьокуускайдааҕы епархия сэкирэтээрэ, Преображенскай кафедральнай собуор настоятелэ, куораттааҕы уокурук былачыыннайа Иеромонах Никандр тыл этиитинэн аста.

«Саха сиригэр эрэ хас сыл аайы кэриэтэ таҥара сулууспатын эбэтэр библия тиэкистэрэ  тылбаастанан тахсаллар. Арааһа, биир да эрэгийиэн, биир да епархия маннык төрүт тылынан тылбаастарынан киэн туттар кыаҕа суоҕа буолуо», — диэн эттэ кини.

Салгыы бу кинигэлэргэ тылбаастанан киирбит үс тыһыынча сыл анараа өттүгэр суруллубут мэлииппэлэр тыллара сахалыы сатараатылар. Саха драмтыйаатырын артыыстара Елизавета Потапова уонна Анатолий Николаев былыр суруллубут мэлииппэлэри сахалыы дорҕоонноохтук ааҕан, дохсун ытыс тыаһынан биһирэннилэр.

Дьокуускай епархиятын тылбаас салаатын салайааччыта Саргылана Леонтьева санаатын маннык үллэһиннэ: «Екклесиаста – бу аан дойду литэрэтиирэтин шедеврэ, поэтическай кинигэ. Элбэх поэтическай ньымалардаах – параллелизм, тэтим, дорҕоон уруһуйа, тыл оонньуута. Элбэх афоризмнаах. Тылбаас устуга бастакы строкалартан саҕаланар. Эһиги бары өйдүүргүт буолуо: «Түбүгүрүү түбүгэ»,  –  диэбитэ Екклесиаст, –  түбүгүрүү түбүгэ, барыта түбүк». Биһиги өйдөбүлбүтүнэн, «түбүгүрүү түбүгэ» диэн көдьүүһэ суох сүпсүк, элэҥнээһин, аймалҕан. Оттон ис дьиҥэр, бу тыллар кыл түгэнэ, быстах кэм, суолтата, дуона суох, мээнэ диэн суолталаахтар».