Эколог күнүгэр – Уус-Ньараҕа далааһыннаах субуотунньук

Бэс ыйын 5 күнэ — Аан дойдутааҕы айылҕа харыстабылын күнэ. ХНТ Генеральнай Ассамблеята бу күн дьон тулалыыр эйгэни харыстыыр, тупсарар баҕатын бигэргэтэр тэрээһиннэри ыыталларыгар ыҥырар.

Арассыыйаҕа Айылҕа харыстабылын күнүн сэргэ бу күн Эколог күнэ бырааһынньыгынан эмиэ бэлиэтэнэр. Бэс ыйын 5 күнэ үгэс быһыытынан дойду үрдүнэн субуотунньуктар буолаллар. Бу күн дьон айылҕаны харыстыыр баҕалаахтарын көрдөрөн, тыаҕа тахсан сири-уоту бөхтөн ыраастыыллар, сир оҥоһуутун уонна да атын айылҕа харыстабылыгар туһуламмыт тэрээһиннэри ыыталлар.

Эколог күнүгэр туох тэрээһин буоларын туһунан Өймөкөөн улууһунааҕы айылҕа харыстабылын судаарыстыбаннай хонтуруолун инспекциятын салайааччыта Виталий Кондаков маннык билиһиннэрдэ:

– Эколог күнүн аан дойдутааҕы айылҕа харыстабылын күнүгэр айылҕаҕа тиийэн субуотунньуктаан, идэлээх бырааһынньыкпытын бэлиэтээтибит. Оройуон киинин тэрилтэлэрин үлэһиттэрин, уопсастыбанньыктары кытта Сынньалаҥ зонатын, Индигир өрүс биэрэгин, Ампор үрүйэ учаастактарынан далааһыннаах субуотунньуктары ыыттыбыт. Бу оройуон киинин олохтоохторо уонна ыалдьыттара сөбүлээн сынньанар сирдэрэ. Хомойуох иһин, маннык кэрэ сирдэри кэрийэн баран, дьон бэйэтин кэнниттэн хомуйбат: элбэх пластик бытыылка, тимир бааҥка, салапаан мөһөөччүк арааһа уо.д.а. бөх-сыыс ыһыллан сытар. Эколог күнүгэр ыытыллар субуотунньук – айылҕа туһугар кыһамньыны көрдөрөр, айылҕа кыһалҕаларыгар болҕомтону тардар бэртээхэй ньыма.

Түгэнинэн туһанан, кэллиэгэлэрбин идэлээх бырааһынньыкпытынан – Эколог күнүнэн истиҥник эҕэрдэлиибин уонна ис сүрэхпиттэн кытаанах доруобуйаны, үлэлэригэр ситиһиилэри баҕарабын. Айылҕа харыстыбылыгар идэлэригэр олус бэриниилээх дьон үлэлииллэр. Ийэ айылҕабытын бары харыстыы, араас айылҕа иэдээниттэн көмүскүү сылдьыаҕыҥ.

… Ити курдук Өймөкөөн улууһун экологтара улуус киинэ Уус-Ньара олохтоохторун көҕүлээн, киэҥ далааһыннаах субуотунньугунан идэлээх бырааһынньыктарын бэлиэтээтилэр.