Экологическай дьыктаан ыытыллыаҕа

Ахсынньы 5 күнүгэр сарсыарда 11 чаастан Национальнай бибилэтиэкэҕэ Бүтүн Арассыыйатааҕы экологическай дьыктаан буолуоҕа. Дьыктаан сыала-соруга — экология култууратын иҥэрии, билиини-көрүүнү хаҥатыы.

Экологическай дьыктаан аан бастаан 2019 сыллаахха ыытыллыбыта. Онно 45 эрэгийиэҥҥэ 80 тыһыынчаттан тахса киһи кыттыбыта. 2022 сылга кыттааччы ахсаана 4,23 мөлүйүөн киһиэхэ тиийбитэ, 89 эрэгийиэн бары кыттыбыттара.

Тэрээһин онлайн-көрүҥүнэн  Экодиктант.рус порталга уонна бибилэтиэкэлэргэ ыытыллар. Арассыыйа ханнык баҕарар олохтооҕо кыттар кыахтаах.

Бу күн «Меняем крышки и батарейки на конфеты» диэн экологическай аахсыйа ыытыллыаҕа. Былаастык хаппахтары уонна туһаныллыбыт батарыайкалары хомуйан, анал сиргэ туттарыахтара. Аахсыйа ахсынньы 5 күнүттэн 28 күнүгэр диэри ыытыллар.