Экология миниистирэ эко-актыбыыстары кытары көрүстэ

Бэҕэһээ СӨ экологияҕа, айылҕаны туһаныыга уонна ойуур хаһаайыстыбатын миниистирэ Евгений Перфильев “Зеленые пионеры” IX өрөспүүбүлүкэтээҕи сүлүөт кыттыылаахтарын кытта көрүстэ. Бу туһунан СӨ экологияҕа, айылҕаны туһаныыга уонна ойуур хаһаайыстыбатын министиэристибэтин пресс-сулууспата иһитиннэрэр.

Эдэр эко-актыбыыстар миниистиргэ араас ыйытыылары биэрдилэр: биографиятыттан уонна успуорка сыһыаныттан саҕалаан, үлэтин-хамнаһын уонна экологияҕа суолталаах тус хаачыстыбаларыгар тиийэ. Улуустар экологическай кыһалҕаларын, ойуур баһаардарын уонна да атын туһааннаах тиэмэлэри дьүүллэстилэр. Көрсүһүү хаартыскаҕа түһүүнэн түмүктэннэ. Оҕолор Евгений Андреевиһы кытта хаартыскаҕа түһэн үөрдүлэр-көттүлэр.

Маннык тэрээһиннэр оҕолорго Экология министиэристибэтин үлэтин уонна хайысхаларын үчүгэйдик өйдүүллэригэр көмөлөһөр. Ону тэҥэ экология миниистирэ үүнэр көлүөнэни айылҕа харыстабылын тэрээһиннэригэр, миитиннэргэ, экспедицияларга көхтөөхтүк кытталларыгар уонна эколог идэтин таларга ыҥырда.