Экология министиэристибэтэ байыаннай дьайыыга көмөтүн уолаттар туттулар

Байыаннай дьайыыга сылдьар биһиги байыастарбыт өйөбүлгэ, көмөҕө улаханнык наадыйаллар.
Экологияҕа, айылҕаны туһаныыга уонна ойуур хаһаайыстыбатын министиэристибэтин араас салааларыттан ДНР-га, ЛНР-га уонна Курскай уобаласка 45 киһи сулууспалыы сылдьар.

Министиэристибэ үлэһиттэрэ ыйдааҕы көмөҕө биэрэр харчыларынан байыаннай сулууспалаахтар сакаастарынан уочараттаах гуманитарнай көмөнү ыыттылар.
Экология министиэристибэтэ ыыппыт «Фермер» УАЗ массыыната Донбаһы өйүүр хотугулуу-илиҥҥи пуонда көмөтүнэн  байыаннай дьайыы сиригэр  тиийдэ.
Ону таһынан байыастарга тепловизионнай прибордары, «Булат» v.4. БПЛА портативнай детектордары, уот генератордарын, автономнай дизельнэй ититэри, хас биирдии байыаска министиэристибэ үлэһиттэрэ бэйэлэрэ баайбыт маскировочнай сиэккэлэрин, П.Н. уонна Н.Е. Самсоновтар ааттарынан Хатас орто оскуолата оҥорбут соботтон хатарыллыбыт миинин, илийбэт хомуллар олбохтору, сылаас утуйар мөһөөччүктэри, бастакы көмөнү оҥорорго нобуордаах тактическай суумка-аптечкалары, араассыйалаах,  30000 мАч кыамталаах аккумулятордаах, сүүскэ кэтэр банаардаах, портативнай гаас билиитэлээх уонна гаас баллоннаах, о.д.а. маллаах тактическай үрүсээктэри ыыттылар.
Миниистири солбуйааччы Анатолий Алексеев салалтатынан барбыт министиэристибэ үлэһиттэрэ 15 байыаһы кытары көрсөн комплекстары уонна гуманитарнай көмөнү туттардылар. Оттон атын таһаҕас инники кирбиигэ сылдьар байыастар таҕыстахтарына тиэрдиллиэ.
Байыастар биир дойдулаахтарыгар гуманитарнай көмөлөрүн иһин махталларын тиэрдэллэр.
Министиэристибэ  байыаннай дьайыыга сылдьар үлэһиттэригэр тиһигин быспакка көмөлөһөр. Ону таһынан министиэристибэ бары салааларын үлэһиттэрэ байыаннай дьайыы кыттыылаахтарын дьиэ кэргэттэригэр көмөлөһөллөр.
«Биһиги байыастарбыт этэҥҥэ кыайыы көтөллөөх кэлэллэрин күүтэбит», — диэтэ Анатолий Алексеев.