Экологтар Мүрү күөл киртийиитин туһунан иһитиннэриини бэрэбиэркэлээтилэр

Экологтар Мүрү күөл киртийиитин туһунан иһитиннэрии кэнниттэн Уус Алдан оройуонугар суһал чинчийиини ыыттылар.

Бу туһунан Экология министиэристибэтэ иһитиннэрэр. Чинчийии түмүгүнэн, биир дьиэ таһыгар убаҕас бытовой тобохтор тохтубуттарын түмүгэр улахан иэннээх сиргэ тарҕанан тоҥмута билиннэ. Сири киртитии иэнэ 633 квадратнай миэтэрэҕэ тэҥнэспит уонна Мүрү Күөлүттэн 200 миэтэрэ тэйиччи сытара быһаарыллыбыт.

Буору буортулааһын чахчыларын быһаарыыга, экологтар эспэртииһэҕэ анаан «РИАЦЭМ» экология лабораториятыгар буор боруобатын ылан ыыттылар. Эспэртииһэ түмүгүнэн хаһаайыстыба эппиэттээх үлэтигэр-хамнаһыгар сөптөөх сыанабыла бэриллиэҕэ.