Экологтар Нам улууһун олохтоохторугар булт сокуонугар уларыйыы туһунан билиһиннэрдилэр

Бэҕэһээ, муус устар 17 күнүгэр, Айылҕа харыстабылын министиэристибэтин үлэтин хааччыйар Киин дириэктэрин солбуйааччы Александр Попов салайааччылаах 8 киһилээх үлэлиир бөлөх айылҕа харыстабылын боппуруостарыгар икки былаһаакканан Н.М. Рыкунов аатынан Намнааҕы киин бибилэтиэкэҕэ сэминээр ыытта.

Сэминээргэ Андрей Собакин салайааччылаах Намнааҕы судаарыстыбаннай, экологическай кэтээн көрүү иниспиэктэрэ, улуус дьаһалтатын, нэһилиэктэр, тэрилтэлэр салайааччылара, исписэлиистэрэ, урбаанньыттар, булчуттар, балыксыттар, интэриэстээх дьон кыттыыны ыллылар. Сэминээргэ тулалыыр эйгэҕэ антропогеннай уонна техногеннай дьайыы күүһүрэн иһиитин намтатыыга үлэни ыытыы, айылҕаҕа куһаҕаннык дьайар эбийиэктэри учуоттааһын, тулалыыр эйгэни киртитэр эттиктэр испииһэктэрин билиһиннэрии уонна тулалыыр эйгэҕэ куттал суох буолуутун хааччыйыы, биология ресурсаларын көдьүүстээхтик туһаныы туһунан иһитиннэриилэри оҥордулар.

Булчуттарга, балыксыттарга – бултааһын, балыктааһын сокуонугар саҥа киириилэри, ирдэбиллэри, нэһилиэнньэ экологическай култууратын итиэннэ өрөспүүбүлүкэ гражданскай уопсастыбатын эппиэтинэһин үрдэтии туһунан кэпсээтилэр диэн Нам улууһун дьаһалтатын пресс-сулууспата иһитиннэрэр.

Ону таһынан уопсастыбаннай иниспиэктэрдэр үлэлэригэр киирбит уларыйыылары билиһиннэрдилэр. Киирбит ыйытыктарга хоруйдаатылар. Сэминээри ыытааччылар, сирбитин-уоппутун дьадатан, тыынар салгыммытын уонна иһэр уубутун киртитэн, айылҕаттан ыларбыт эрэ сатамматын, экэниэмикэни сайыннарарбытыгар, ханнык баҕарар бырайыактары былаанныырбытыгар туох ханнык иннинэ сирбитигэр-уоппутугар кыһаныахтаахпытын, өрөспүүбүлүкэ хас биирдии киһитэ дьоллоохтук олорорун туһугар чэгиэн, ыраас эйгэни хааччыйыахтаахпытын тоһоҕолоон бэлиэтээтилэр.