Экологтар нэдиэлэтээҕи мунньахтарын байыаннай дьайыыга көмөттөн саҕалаатылар

Бүгүн Экологияҕа, айылҕаны туһаныыга уонна ойуур хаһаайыстыбатыгар министиэристибэтигэр миниистири бастакы солбуйааччы Дьулустаан Хон салалтатынан нэдиэлэтээҕи мунньахтара уратытык ааста.

Үгэс буолбут аактабай саалаҕа олорон мунньахтыыр оннугар, департаменнар, отделлар салайааччылара нэдиэлэтээҕи боппуруостарын уонна соруктарын анал байыаннай дьайыыга анаан маскировкалыыр сиэккэлэри баайа сылдьан ыыттылар.

Бу иннинэ, сэтинньи 7 күнүгэр, иистэнньэҥ волонтердар министиэристибэ үлэһиттэрин сиэккэни хайдах баайаарга үөрэппиттэрэ.

«Билигин, эбиэттиир сынньалаҥ эбэтэр, бүгүҥҥү курдук, дьыаланы быһаарса таарыйа, анал байыаннай дьайыыга ыытарга маннык оҥоһуктары бэлэмниэхпит. Кинилэр саллааттарга сэби-сэбиргэли уонна байыаннай тэриллэри маскировкалыырга туһалаах буолуохтара. Хас биирдии таҥас лоскуйа биһиги байыастарыбытын быыһыан сөп!», — диэн санааларын үллэһиннилэр министиэристибэ үлэһиттэрэ.