Эксээмэн чугаһаан, түөкүттэр оскуола оҕолорун “бултаһаллар”

Саас эксээмэннэри туттарыы кэмигэр түөкүттэр өссө эбии элбии түһэллэр. ОГЭ, БКЭ дьиҥнээх эппиэттэрин эбэтэр ыйытыылардаах бланкаларын харчыга ыытыахпыт диэн албынныыллар.

2025 сыл муус устарыгар хас да сабыылаах Telegram-ханаал уонна 100-тэн тахса саайт баара булуллубута. Манна төлөбүргэ эксээмэн эппиэттэрин ыыталлар. Ол гынан баран Рособрнадзор иһитиннэриитинэн, эмсэҕэлээччилэргэ былырыыҥҥы эппиэттэр кэлиэхтэрин, сороҕор харчыны ылан баран олох да сүтэн хаалыахтарын эмиэ сөп. Дьиҥнээх эппиэттэри эксээмэн иннинэ ким да ылар кыаҕа суох дииллэр биэдэмистибэҕэ.

Онон официальнай источниктары эрэ туһанар ордук: ФИПИ саайтын, Рособрнадзор саайтыгар баар “Навигатор ГИА” салааны. Онно бары биридимиэттэринэн араас барыйааннар, сорудахтар, сорудахтары оҥорбут разработчиктар видеонан сүбэлэрэ бааллар. Ситимнэргэ тарҕанар матырыйааллар дьиҥнээх КИМ-нэргэ туох да сыһыаннара суох дииллэр Рособрнадзорга.