Өксөкүлээх аатынан бириэмийэни Иван Степановка туттардылар

Өксөкүлээх Өлөксөй аатынан Судаарыстыбаннай бириэмийэни РФ, СӨ норуодунай артыыһа, «Полярная звезда» уордьан кавалера Иван Степановка туттардылар.

Иван Прокопьевич Степанов 1945 сыл от ыйын 14 күнүгэр Мэҥэ Хаҥалас улууһун Майа сэлиэнньэтигэр төрөөбүтэ. 1967 сыллаахха Дьокуускайдааҕы художественнай училищены бүтэрбитэ. Ойуунускай аатынан Дьокуускайдааҕы муусукаалынай-драматическай тыйаатырга художник-оформитель быһыытынан үлэлээбитэ.

Ыллыыр дьоҕурдааҕын, ураты бас куоластааҕын таба көрөн, М.Мусоргскай аатынан Ураллааҕы консерваторияҕа вокальнай факультекка үөрэттэрэ ыыппыттара.

1973 сылтан Дьокуускайдааҕы опера, балет тыйаатырын солиһа. 1984-85 сылларга Москваҕа Большой тыйаатырга стажировкаламмыта.