Хаартыска: Суруйааччылар сойуустара
«Бэҕэһээ киэһэ, от ыйын 6 күнүгэр, бу орто дойдуттан Өксөкүлээх Өлөксөй улахан сиэнэ, Кулаковскайдар аймах тумус туттар эдьиийдэрэ, Арассыыйа уонна Саха Өрөспүүбүлүкэтин култууратын үтүөлээх үлэһитэ, педагогика уонна мусуой үлэтин бэтэрээнэ , сырдатааччы Раиса Реасовна Кулаковская биһиги кэккэбититтэн туораата.
Раиса Реасовна – эһэтэ Өксөкүлээхтэн саҕаламмыт педагогтар династияларын чаҕылхай салҕааччыта этэ. 1970-1990 сылларга Уус Алдан оскуолаларыгар кини көҕүлээһининэн төрүт үгэһи сөргүтүүгэ, саха тылын сайыннарыыга, литературабыт устуоруйатын дириҥэтэн үөрэтиигэ үгүс өрүттээх үлэлэр барбыттара. Суоттуга үлэлиир кэмигэр поэт, уопсастыбаннай диэйэтэл С.С. Васильев-Борогонскай үтүө аатын үйэтитиигэ дьоһун кылаатын киллэрбитэ. «Васильев ааҕыыларын», сыл ахсын туттарыллар кини аатынан бириэмийэни үгэскэ кубулутан, тыа сирин оскуолатын Арассыыйа таһымыгар таһаарары ситиспитэ.
Норуодунай суруйааччы, Социалистическай үлэ дьоруойа Д.К. Сивцев-Суорун Омоллооннуун тэрийсибит «Доҕордоһуу» Өлүөнэтээҕи устуоруйа уонна архитектура судаарыстыбаннай мусуойун өр кэмҥэ дьоһуннук салайбыта. Эһэтин кэриэһин толорон, Саха сирэ Арассыыйалыын доҕордоһуутун, Саха сирин омуктарын ситимнэрин сырдатар үлэни киэҥник ыыппыта; туристыы биисинэс сайдыытыгар киэҥ үлэни тэнитэн, мусуой аан дойду таһымыгар тахсыытыгар үгүс сыратын уурбута. Раиса Реасовна салалтатынан үгүс норуоттар икки ардыларынааҕы уонна бутүн Арассыыйатааҕы түһүлгэлэр «Доҕордоһуу» мусуой сиригэр ыытыллыбыттара: «Олоҥхо сиригэр аан дойду култуурата» бэстибээл, ЮНЕСКО генеральнай сэкирэтээрэ Коитиро Мацуураны, Франция Арассыыйаҕа посола Жан Кадены уо.д.а. ыалдыттааһыннарын, Арассыыйа Суруйааччыларын сойууһун көс пленумун кыттыылаахтарын көрсүү тэриллибитэ. Саха сирин култууратын уонна устуоруйатын дириҥник билээччи быһыытынан араас таһымнаах кэмпириэнсийэлэргэ, сэминээрдэргэ, куурустарга үгүстүк кыттара, дириҥ ис хоһоонноох дакылааттары, лиэксийэлэри ааҕара.
Раиса Реасовна саха айар интэлигиэнсийэтин кытта бигэ ситими тутара, эһэтин саха суругунан литературатын төрүттээбит поэт, саха духуобунай лидерэ Өксөкүлээх Өлөксөй, аҕатын ССРС Суруйааччыларын сойууһун чилиэнэ Реас Кулаковскай, аҕа доҕорун норуот суруйааччыта, сырдатааччы Суорун Омоллоон сырдык ааттарын үйэтитиигэ үгүс үлэни ыытара. Меценат быһыытынан араас өрүттээх көмөнү үөрэх тэрилтэлэригэр, устудьуоннарга, култуура тэрилтэлэригэр оҥороро. Кини Өксөкүлээх улахан сиэнин ындыытын үйэтин тухары дьоһуннук сүкпүтэ, көлүөнэ чаҕылхай ситимэ, саха норуотун сырдатааччы этэ.
Саха литературатын устуоруйатын тыыннаах сорҕото буолбут, саха суруйааччыларын улахан доҕордоро, эдьиийдээтэр эдьиийбит, дьоһун-мааны Раиса Реасовна Кулаковская бу орто дойдуттан суох буолбутунан дьиэ кэргэнигэр, бары Кулаковскайдар аймахха, саха норуотугар дириҥ кутурҕаммытын тиэрдэбит.
Күндү киһибит быраман дьылларга быраһаай!..»
Саха сирин Суруйааччыларын сойууһа уонна «Чолбон» сурунаал эрэдээксийэтэ
Ил Түмэн спикерэ Алексей Еремеев парламеҥҥа сэттис (уочараты таһынан) пленарнай мунньахха ыҥырар дьаһалга илии баттаата.…
Бүгүн, ыам ыйын 17 күнүгэр, Дьокуускай куорат Хатас бөһүөлэгэр олохтоох Мария Оконешникова сүүрэ сылдьан кыталыктары…
Бүтэһик сууккаҕа Дьокуускайга сааскы халаан уутун таһыма үрдүүрэ күүтүллэр. Бүгүн, ыам ыйын 17 күнүгэр, сарсыарда…
Ыам ыйын 15 күнүгэр Үөһээ Бүлүү улууһун Туобуйа нэһилиэгэр икки киһи эмсэҕэлээһиннээх быһылаан тахсыбыта. Туобуйаттан…
Бэҕэһээҥҥиттэн, ыам ыйын 16 күнүттэн, «Полярные авиалинии» Ми-8 бөртөлүөтэ Өлүөнэ өрүһү туоратар үлэтин саҕалаата диэн…
Бүгүн, ыам ыйын 17 күнүгэр, Дьокуускай-Аллараа Бэстээх хайысханан сылдьар "хивустар" сырыылара сөргүтүллүбүтүн туһунан СӨ Тырааныспарга…