Экстремистэр тэрилтэлэрин үбүлээбит киһиэхэ бириигэбэр таҕыста

СӨ Үрдүкү Суута Мэҥэ Хаҥалас улууһуттан төрүттээх, 1988 сыллаах төрүөх киһи экстремистскэй тэрилтэни үбүлээһиҥҥэ буруйдаах диэн (РФ ХК 282.3 ыст. 1 ч.) Дьокуускай куорат суута уурбут уурааҕын ааһына сатаабытын уларыппата.

Бу туһунан СӨ сууттарын холбоһуктаах пресс-сулууспата иһитиннэрэр.

Суут быһаарбытынан, сууттанар киһи экстремистскэй тэрилтэ буоларын эрдэттэн билэн, бобуулааҕын өйдөөн туран, 2021 сыл сэтинньититтэн 2022 сыл тохсунньутугар диэри ый ахсын 300 солкуобайы ыыппыт. Уопсайа – 900 солкуобай кинилэр счеттарыгар ыыппыт. Харчы Wells Fargo (АХШ) баан нөҥүө ыытыллыбыт уонна биирдэ туттуллар СМС-кодтарынан бигэргэтиллибит, ол аата бу сууттанар киһи ыытар харчытын сыалын чопчу билэрин туоһулуур.
Сууттанар киһи харчытын өйдөөн туран ыыппыт уонна былаастарга иһитиннэрбэтэх, экстремистскэй тэрилтэ үлэтин тохтотор туһунан дьаһалы ылымматах.

Силиэстийэни чэпчэтэр усулуобуйалары (кыра оҕолооҕунан, силиэстийэҕэ көмөлөспүтүн, ону таһынан чугас дьонун доруобуйатын) учуоттаан, суут бу киһиэхэ 300 000 солкуобай ыстараабы 12 ый устата ыйга 25 000 солкуобайынан төлүүр гына уураахтаата.

Буруйдаах көмүскээччитэ буруйу чэпчэтиини эбэтэр дьыаланы тохтотор ирдэбилин, Саха Өрөспүүбүлүкэтин Үрдүкү Суута аккаастаата. Суут экстремистскэй үлэни үбүлээһин – бу судаарыстыба куттала суох буолуутун утары туһуламмыт улахан буруй буоларын уонна суолтата кыра буолбатаҕын бэлиэтээтэ.
Буруйдаахтан 900 солкуобай харчы экстремистскэй тэрилтэҕэ ыытыллыбыт үп судаарыстыба дохуотугар тутулунна.
Бириигибэр күүһүгэр киирдэ.