ПМЭФ 2024: «Экстра Синема» хампаанньа Саха сиригэр 120 саҥа киинэ саалатын тэрийиэҕэ

Петербурдааҕы аан дойдутааҕы экэнэмиичэскэй пуорумҥа (ПМЭФ) Ил Дархан Айсен Николаев Сыыппара уонна технологическай сайдыы боппуруостарыгар РФ Бэрэсидьиэнин анал бэрэстэбиитэлэ Дмитрий Николаевич Песковтыын оробуочай көрсүһүүтэ буолан ааста.

Саха сирин «Экстра Синема» хампаанньата уонна «Спутник- Управление активами НТИ» ХЭУо экэнэмиичэскэй пуорумҥа бииргэ үлэлээһиннэри сайыннарыыга инвестиционнай дуогабарга илии баттастылар.

««Спутник- Управление НТИ» ХЭУо 200 мөл. солк. суумалаах үбүлээһини Саха сирин «Экстра Синема» хампанньаҕа биэриэҕэ. Онон, «Экстра Синема» баазатыгар сылга 2 000 проекторы оҥорор кыамталаах сыаҕы үлэҕэ киллэриэҕэ, ону кытта биһиги өрөспүүбүлүкэбитигэр 120 саҥа киинэ саалата тэриллиэҕэ. Бу нэһилиэктэринэн 200 тыһыынча олохтоохторго киинэни улахан экраҥҥа көрөр кыах биэриэҕэ», — диэн Ил Дархан Айсен Николаев ТГ-ханаалыгар иһитиннэрэр.

Салгыы Ил Дархан Айсен Николаев  Арассыыйа инновационнай эрэгийиэннэрин Ассоциацияларын салайааччыларын кытта көрсүһүүгэ РФ Бэрэсидьиэнин дьаһалтатын салайааччытын солбуйааччы Максим Орешкин уонна РФ Экэнэмиичэскэй сайдыыга миниистирин солбуйааччы Максим Решетников кыттыылаах көрсүһүүгэ кытынна. Көрсүһүү кэмигэр Ил Дархан Саха сиригэр инновацияны өйүүр дьаһаллар туһунан кэпсээтэ.

Санатан эттэххэ, 27-с Петербурдааҕы аан дойдутааҕы энэмиичэскэй пуорум бу сыл бэс ыйын 5 күнүттэн саҕаламмыта. Пуорум хонуутугар барыта 380 тэрээһиннэри ыытыы былааннанар. Саха сирин бэрэстэбиитэллэрэ сиэссийэлэргэ, ол иһигэр Арктика, эрэгийиэн инновационнай кыаҕын сайыннарыыга, алмаас-бриллиант салаатыгар уонна да атын боппуруостарга БРИКС дойдуларын кытта бииргэ үлэлээһиннэри сайыннарыыга кыттыахтара.