“Экстра Синема” Индияҕа 10 тыһыынчаҕа диэри киинэ саалатын арыйар былааннаах

“Экстра Синема” Саха сирин хампаанньата” уонна “Janta Cinemа” Индия хампаанньата Индияҕа саха технологиятын киинэ ситимин арыйар туһунан сөбүлэһии түһэристилэр.

“Создано на Дальнем Востоке” норуоттар икки ардыларынааҕы креативнай индустрия пуорумун кэмигэр “Экстра Синема” саха хампаанньата уонна  “Janta Cinemа” Индия хампаанньата Индияҕа саха технологиятын киинэ ситимин арыйар туһунан сөбүлэһиигэ илии баттастылар. Бу туһунан пуорум пресс-киинэ иһитиннэрэр.

Быйыл атырдьах ыйыгар уон тестовай киинэ саала бастакынан арыллыаҕа. Сөбүлэһиигэ олоҕуран, өрүттэр Индияҕа бырайыак чэрчитинэн киинэ саалаларын арыйар уонна туһанар санаалаахтарын бигэргэттилэр. Индия Өрөспүүбүлүкэтин Трипур штатыгар 224 киинэ саалата арыллыаҕа, онтон кэлэр икки сыл устата Индия үрдүнэн 10 тыһыынчаҕа тиэрдиэхтэрэ.

Сөбүлэһиигэ “Экстра Синема” генеральнай дириэктэрэ Петр Чиряев уонна “ Janta Cinema” хампаанньаны төрүттээбит Юсуф Шаих и Джагеш Савджан илии баттаатылар.

“Индияҕа оробуочай сырыым кэмигэр киинэ судаарыстыбаннай корпорациятын уонна министиэристибэлэр бэрэстэбиитэллэрин кытта көрсүбүтүм. Кинилэр “Janta Cinema” диэн дойду кыаммат араҥатыгар маассабайдык киинэ көрдөрөр хампаанньаны кытта билиһиннэрбиттэрэ.  Атырдьах ыйыгар онно 10 тестовай көрүҥнээх киинэ саалатын туруоруохтара. Бу сөбүлэһии 10 тыһыынча киинэ саалатын таҥарга көмөлөһөр. Индия курдук улахан, элбэх нэһилиэнньэлээх дойдуну кытта бииргэ үлэлиэхпит”, — диэтэ Петр Чиряев.