Салгыы
Экстрасенс Сырдык: «90-с сыллар курдук буолуон сөп»

Экстрасенс Сырдык: «90-с сыллар курдук буолуон сөп»

02.01.2023, 10:00
Бөлөххө киир:

Хас сыл аайы киһи барыта, улаханныын-кыралыын Саҥа дьылтан туох эрэ дьиктини, кэрэни күүтэр. Саҥа үүнэр сыл түүнүгэр, Саҥа дьыл алыптаах түүнүгэр киһи аймах саамай кистэлэҥ баҕа санаатын этэр, үчүгэйгэ, үтүөҕэ эрэнэр. Бары даҕаны бу күүтүүлээх, долгутуулаах кэлэр сыл хайаан да ааһан эрэр сыллааҕар ордук буолуо, кыһарыйыы, хомолто, аймалҕан кэннибитигэр хаалыаҕа диэн эрэнэр. Оттон бу кэлэр 2023 сыл тугу түстүүрүй, биһиги тугу кэтэһэбитий? Ол туһунан астрология, чараас эйгэ дьоно туох дииллэрий?

Алексей Божедонов-Сырдык, экстрасенс:

– Аар айылҕа киртэн-хохтон ыраас­танаары, ардах оҥорон түһэрэр. Ааспыт сылга Үөһээ Дьааҥыга түспүт ардах быйыл Саха сирин киинигэр иһэр, сылынан кэлэр. Кэлэр сылга күүстээх ардахтар түһүөхтэрэ, уу кэлиэ. Ардах ааспыт сылга Суордаахха курдук ыйы быһа түһүө, алаас сирдэр ууга барар кутталлаахтар. Итини мин дьону куттаан эппэппин, сэрэтэн, бэлэмнэнниннэр диэн этэбин. Тиэхиньикэни үчүгэйдик бэлэмниэххэ наада. 2023-2024 сыллар бы­­йылгы курдук түһүүлээх-тахсыы­лаах, аан дойду кириисиһэ, сааҥсыйата сабыдыаллаан, ас-таҥас сыаната аһара көтүөн сөп. Онон аһы хаһааныахха наада, холобур, тушенка, мокоруон, саахар, чэй, дьон күннээҕи аһыырын. Тоҕо диэтэххэ, мин көрөрбүнэн, сааҥсыйаттан сыл­таан 90-с сыллар курдук буолуон сөп. Саха омук былыр-былыргыттан хаһаастаах буолар, тугу хаһан сиэхтээҕин хаһаанар идэлээх. 2025 сылтан дьэ олохпут үчүгэй өттүгэр көнүө.

Бу барыта айылҕа киһи аймахха иэстэбилэ буолар. Дьон аан дойду үрдүнэн аһара элбээн, айылҕабыт, сирбит-уоппут бэйэтэ итинник оҥорор. Ол иһин биһиги сахалар итэҕэллээх буолуохтаахпыт уонна үтүө тыллары туттан мэлииппэ курдук ааҕа сылдьыахтаахпыт. Биһиэхэ мэлииппэ курдук, махтал тыла киириэхтээх, Айбыт айыыһыкка, Үрүҥ Аар Тойоҥҥо, сиргэ-уокка, о.д.а.

Айыыларга биһиги күҥҥэ үстэ үҥүөхтээхпит, махтаныахтаахпыт, алгыах­таахпыт. Алгыстаах омуктар олохторо уу нусхал буолар. Өбүгэ этэринэн, сир-дойду иччилэрэ ыраастыыр аналлаахтар. Тыынар салгыҥҥын, иһэр уугун махтана туттуох­тааххын. Барыта бэйэ-бэйэтин кытары сибээстээх, холобур, чэй куттаргар бас­таан Эбэҕэ махтаныахтааххын, бу курдук бара туруохтаах. Күҥҥэ 40 мүнүүтэ махтанар буоллахха, дьиэ кэргэн туруктаах буолар, быһылааҥҥа, оһолго түбэспэт, арыгылааһын, арахсыы, этиһии, айдаан буолбат. Бу көрдөһүү буолбакка, махтал тыллара буолуохтаах. Билэр дьонум көрдөһөн, мин байыаннай дьайыыларга сылдьар уолаттарыгар араҥаччылыыр, махтанар тыллары ыыппытым, оҕолоро этэҥҥэ кэллилэр. Итэҕэл диэн итинник, көннөрү сылдьан эрэ ааҕа сылдьыах­тааххын.

Хамсык дьаҥа айылҕабыт алдьанан, ону оһорунаары таҕыста. Сир үрдүгэр дьону аҕыйатаары, ити бастакыта. Иккиһинэн, аһара «комфорка», бэлэмҥэ олорорго үөрэннибит, экология, тулалыыр айылҕабыт алдьанар, ийэ сирбитигэр охсор. Онон киһи толкуйдуохтаах таҥас-сап, мал-сал оноһулларыгар үлүгэрдээх айылга ресурсата алдьанарын.
Саха итэҕэлэ төнүннэҕинэ эрэ көмүс­кэллээх буолуохпут. Итэҕэл диэн сиэр-туом эрэ буолбакка, киһиэхэ махтанары иҥэрэр тиһик буолуохтаах. Чараас эйгэҕэ итэҕэл­бититтэн саамай көдьүүстээҕинэн махтал эрэ буолар, 98 % кутуҥ-сүрүҥ чөлүгэр түһэр. Үс кут чөл буоллаҕына барыта этэҥҥэ буолуо. Онон эрдэттэн махтанан куйах оҥостунуохтаахпыт. Былыргы сахалар киҥинэйэн ыллыыллар этэ, ол иһин туруктаах буолаллара. Күҥҥэ, салгыҥҥа, сиргэ, ууга махтанар итэҕэл кии­риэхтээх. Этэҥҥэ буолуҥ!

Лента
Салгыы
6 февраля
  • -44°C
  • Ощущается: -51°Влажность: 66% Скорость ветра: 2 м/с

Сообщить об опечатке

Текст, который будет отправлен нашим редакторам: