Экстремизмҥэ сыһыаннаах ыҥырыылары тарҕаппыт эдэр уол сууттанна

Сэтинньи 17 күнүгэр Дьокуускай куорат суута РФ ХК 280-с ыстатыйатын 2-с чааһынан холуобунай дьыаланы көрдө.

Суутунан быһаарыллыбытынан, 2002 с.т. буруйданааччы былырыын тохсунньу 25 күнүгэр түүн дьиэтигэр олорон, соруйан, оҥорор дьайыылара уопсастыбаҕа кутталлааҕын өйдөөн, уопсастыбаҕа кутталлаах содул үөскүөн сөбүн билэн туран, биир мессенджер бөлөҕөр экстремистыы дьайыыны оҥорорго дьоҥҥо-сэргэҕэ араас ыҥырыылары таһаарбыт. Маныаха Дьокуускай куорат биир түүҥҥү аралдьытар тэрилтэтигэр буолбут айдаан кэнниттэн олохтоох киһини өлөрүү төрүөт буолбут.

Быһылаан киэҥ уопсастыбаннай аймалҕаны таһаарбыт, онуоха биллибэт дьон биир мессенджеригэр бөлөхтөрү, онно кыттааччылар уопсай ахсаана 5 000-ҕа тиийэ киһиэхэ тиийбит. Кыттааччылар үлэ миграннарын уонна чугас-ыраах тас дойдулартан төрүттээхтэри утары күүһүнэн дьайыылаах аахсыйалары тэрийэр үлэни сүрүннүүргэ туһуламмыт иһитиннэриилэри таһаарбыттар, көҥүлэ суох утарылаһыы аахсыйалары ыытарга ыҥырыылары таһаарбыттара быһаарыллыбыт.

Кэлин, 2024 с. ахсынньы 24 күнүгэр, Дьокуускай куорат куорат суутунан өлөрүүгэ буруйдаах киһи буруйдааҕынан билиниллибит уонна 13 сылга көҥүлэ быһыллан, кытаанах эрэсиимнээх холуонньаҕа 1 сыл 6 ый болдьоххо көҥүлэ хааччахтаммыт. Эспэртииһэ түмүктэринэн,  үлэ миграннарын утары туһуламмыт дьайыылары оҥорорго ыҥырар этиилэр лингвистическэй бэлиэлэрэ бааллара быһаарыллыбыт. Эр киһи буруйун билиммэтэх.

Дьокуускай куорат суута буруйдааҕы РФ ХК 280-с ыстатыйатын 2-с чааһынан буруйдааҕынан билиннэ уонна 2 сыл 10 ый болдьоххо күһэйиинэн үлэлэтиигэ, хамнаһыттан 15%-на судаарыстыбаҕа суотугар  тутарга уураахтаата. Ону таһынан, буруйу оҥоруу таһымыны учуоттаан, суут эбии эппиэтинэс миэрэтинэн информационнай-телекоммуникационнай ситимнэргэ, ол иһигэр куйаар ситимигэр иһитннэриилэри уонна да атын матырыйааллары дьон-сэргэ көрүүтүгэр таһаарар үлэнэн-хамнаһынан дьарыктанар быраабын быста. Уураах сокуоннай күүһүгэр киирэ илик.