Өктөмҥө 76 киһи хаарбах туруктаах дьиэттэн саҥа кыбартыыларга көстүлэр

Хаҥалас улууһун Өктөм нэһилиэгэр 76 киһи дойду Бэрэсидьиэнин «Олорор дьиэ уонна куорат эйгэтэ» национальнай бырайыагын чэрчитинэн, хаарбах уонна саахалланар туруктаах дьиэттэн  көһөрүү өрөспүүбүлүкэтээҕи аадырыстаах бырагырааманан саҥа кыбартыыра күлүүстэрин туттулар.

Саҥа дьиэлээхтэри Хаҥалас улууһугар бырабыыталыстыба отчуотун кэмигэр СӨ Бырабыыталыстыбатын бэрэссэдээтэлин солбуйааччы Анатолий Семенов эҕэрдэлээтэ.

«Элбэх кыбартыыралаах дьиэни аһыы – бу нэһилиэк олоҕун саҥа түһүмэҕэ. Тыа сирин олоҕун усулуобуйата куорат таһымыттан итэҕэһэ суох буолан эрэриттэн олус үөрэбин.  Билигин тыа киһитэ тупсаҕай оҥоһуулаах кыбартыыраҕа олохсуйара олох нуормата», — диэн үөрүүлээх тэрээһиҥҥэ Анатолий Семенов бэлиэтээтэ. Саҥа дьиэ Емельян Андреев уулуссатыгар түөрт мэндиэмэннээх  тутулунна. Дьиэ 2023 сыл ахсынньытыгар үлэҕэ киирбитэ. Кыбартыыралар бары толору өрөмүөннээх туттарылыннылар. Бэдэрээччит «АЭБ Капитал» ХЭО.

Санатан эттэххэ, Владимир Путин көҕүлээбит национальнай бырайыагын чэрчитинэн, Саха сиригэр саахалланар уонна хаарбах туруктаах дьиэлэртэн көһөрүү саамай улахан бырагыраама олоххо киллэриллэр. 2019 сылтан өрөспүүбүлүкэҕэ номнуо 40 тыһыынча киһи 700 тыһыынча кв. м. иэннээх хаарбах туруктаах олорор дьиэлэртэн көһөрүлүннэ. Бу сыллар устата барыта араас муниципалитеттарынан 200-тэн тахса элбэх кыбартыыралаах дьиэ үлэҕэ киирдэ.

  Саха Өрөспүүбүлүкэтин уонна Бырабыыталыстыбатын пресс-сулууспата