«Элбэх оҕолоох дьиэ кэргэн» кыайыылаахтара Боягирдар

Саха сиригэр дьиэ кэргэн сыаннастарын уонна төрөппүт эппиэтинэһин үрдэтэр туһугар 2002 сылтан «Сыл бастыҥ ыала» куонкурус тэриллэр. Куонкуруска сыл аайы 100‑тэн тахса ыал кыттар.
Быйыл «Сыл бастыҥ дьиэ кэргэнэ» өрөспүүбүлүкэтээҕи бэстибээл кыайыылаах дьиэ кэргэттэрэ СӨ Ил Дархана Айсен Николаев 300 тыһыынча солкуобай суумалаах бириэмийэтин туттулар.

«Элбэх оҕолоох дьиэ кэргэн» номинация кыайыылаахтара Өлөөн улууһуттан сылдьар Саргы Владимировна уонна Ян Андреевич Боягирдары кытары билистибит.

-Биһиги Өлөөн эбэҥки национальнай оройуонтан кэлэн кытынныбыт. 2005 с. харахпытынан хайҕаһан, сүрэхпитинэн сөбүлэһэн, ыал буолбуппут.
Эһиилигэр улахан кыыспыт Юрьяна (куобахчаан диэн таптаан ааттыыбыт) күн сирин көрбүтэ. Тастыҥ эдьиийим уол оҕоломмутугар улахан убайбыт Юра диэн ааттаабатахтарыттан хомойбутун биллэрбитэ. Ол иһин, бастакы кыыспыт төрөөбүтүгэр аатын толкуйдуу сылдьан, убайбыт Юрий уонна аҕабыт Ян аатын холбоон, кыыспытын Юрьяна диэн сүрэхтээбиппит.

Онтон 2007 с. улахан уолбут Альберт (таптал аата — эһир-аист) төрөөбүтэ. Кинини оһоҕостоох сылдьан ханнык эрэ нуучча сэрийээлин үлүһүйэн көрбүтүм, онно Альберт диэн ааттаах уол баара. Уол оҕо төрөөтөҕүнэ Альберт диэн ааттыам дии санаабыппын олоххо киллэрбитим.
2008 с. күн сирин көрбүт Дусенька (топатушка) аҕабыт аймах эдьиийин аатын ылбыта.

Онтон салгыы оҕолорбутугар «А» буукубаттан саҕаланар ааттары биэрэн барбыппыт.

2010 с. Арсен (кутуйахчаан) төрөөн, үөрүүбүтүн үрдэппитэ.
Үөһээ айыыларбыт түөрт оҕону бэлэхтээтилэр, аны уоскуйан кинилэри улаатыннартыахпыт, иитиэхпит дии саныы сырыттахпытына, 4 сылынан Айян (байаан), «чаҕааран» кэлбитэ. Айян диэн эбэҥки тылынан «үтүө санаалаах, үчүгэй» диэн суолталаах.

Онтон эһиилигэр кэрэчээн София төрөөбүтэ. Эдьиийэ Дуся «София Прекрасная» диэн ойуулугу көрөн баран, София диэн ааттыан баҕарбыта.
Үс бухатыырдаахпыт уонна 3 кэрэчээн кыыстаахпыт диэн эмиэ уоскуйа быһыытыйбыппыт. Онтон 2021 сыллаахха Аяргун (үгүстэртэн бастыҥнара диэн суолталаах) уонна 2022 сыллаахха «улахан өрүс сүүрүгэ» диэн суолталаах ааттаах Эяна (нанушка) эбиллибиттэрэ.
Онон, элбэх оҕолоох ыал буола түспүппүт. Улахаммыт Юрьяна мусукаалынай оскуола хореографияҕа уонна художественнай кылаастарын ситиһиилээхтик бүтэрбитэ. 9‑с кылаас кэнниттэн Уус Алдаҥҥа тиэхиньукумҥа кондитер-поварга үөрэнэр, иккис кууруһу үчүгэйдик бүтэрдэ.
Альберт быйыл 9‑с кылааһы бүтэрдэ уонна быыһааччы-баһаарынньык буолуон баҕарар.
Дуся 8‑с кылааһы бүтэрдэ, чэпчэки атлетиканан дьарыктанар.
Бэһис кылааһы тахсыбыт Арсеммыт многоборьенан дьарыктанар, кэнники кэмҥэ оҕунан ытыынан үлүһүйдэ.
Айян иккис кылааһы бүтэрдэ, эдьиийин курдук мусукаалынай оскуолаҕа үөрэнэр, футболлуурун сөбүлүүр.
Былырыын оскуола боруогун атыллаабыт Софиябыт мусукаалынай оскуола хореография уонна художественнай кылаастарыгар дьарыктанна.
Эяня – «Чипичакан» оҕо уһуйаанын кырачаан иитиллээччитэ.
Арягуммут – дьиэбитигэр «начаалынньыкпыт»,  — диэн Саргы Владимировна Боягир дьиэ кэргэнин билиһиннэрдэ.
Боягирдар аҕа баһылыктара Ян Андреевич оройуоннааҕы суукка харабылынан үлэлиир. Сайын арыый иллэҥсийдэҕинэ, сыбаарка үлэтинэн, кыһын унтуу улларыынан дьарыктанар.
Ыал ийэтэ, иэримэ дьиэ хаһаайката Саргы Владимировна оҕолорун көрөр-истэр, кинилэри иитиигэ улахан болҕомтотун уурар уонна бэйэтэ үүнэр-сайдар. Дэлэҕэ орто уол Айян: «Биһиги ийэбит наһаа элбэх идэни баһылаабыт: асчыт, быраас, учуутал, дьиэ үлэһитэ уо. д.а.»,  — диэ дуо? Ыал ийэтэ бириэмэ булан иистэнэрин, оҕуруонан тигэрин сөбүлүүр, хайдах эмэ бириэмэ булан, маастар-кылаастарга сылдьарга, дьарыктанарга кыһаллар.

Боягирдар өрөспүүбүлүкэбит киин куоратыгар Саха сирин бастыҥ ыалларын кытары билсэн, ирэ-хоро кэпсэппиттэрин, быыстапка кыттааччыларын талааннарын, үлэлэрин-хамнастарын сөхпүттэрин, бэйэлэрэ эмиэ өй-санаа өттүнэн байан баран эрэллэрин туһунан кэпсээтилэр.