Элбэх оҕолоох дьиэ кэргэттэргэ ОДьКХ төлөбүрүгэр чэпчэтии

Саха сиригэр элбэх оҕолоох дьиэ кэргэттэр ОДьКХ төлөбүрүгэр  30% чэпчэтиини хайдах туһаналларый?

Өрөспүүбүлүкэҕэ ОДьКХ төлөбүрүгэр 30 бырыһыаннаах чэпчэтиини туһанарга элбэх оҕолоох дьиэ кэргэттэр бу сыл балаҕан ыйын 1 күнүттэн https://e-yakutia.ru порталын нөҥүө сайабылыанньа толороллор эбэтэр «Мин докумуоннарым» киин офиһыгар тиийэллэр. Бу туһунан СӨ Ил Дарханын уонна Бырабыыталыстыбатын пресс-сулууспатыгар иһитиннэрдилэр.

Чэпчэтиини туһанарга ирдэбиллэр:

• — элбэх оҕолоох дьиэ кэргэн буоларын туоһулуур докумуоннар (18-гар диэри саастаах эбэтэр 23-с сааһыгар диэри күнүскү өттүгэр үөрэнэр биитэр аармыйаҕа сулууспалыыр үс уонна онтон элбэх оҕолоох ыаллар);
• — регистрациянан эбэтэр суут быһаарыытынан бигэргэтиллибит олорор дьиэтэ-уота;
• — сайабылыанньа биэрэр күнүттэн биир ый иннинээҕи олорор дьиэ хомунаалынай төлөбүрдэрин туоһуулуур кумааҕылара.

Төлөбүр 12 ыйга болдьохтоон ананар. Үп-харчы «Саха сирин олохтооҕо» (Карты жителя Якутии) каартыгар ый ахсын ааҕыллан түһэр.

Санаттахха, бу иннинэ бу сыл муус устар ыйыгар Ил Дархан Айсен Николаев элбэх оҕолоох дьиэ кэргэттэргэ эбии өйөбүллэри аныыр туһунан Ыйаахха баттаабыта. Ол курдук, элбэх оҕолоох дьиэ кэргэттэр балаҕан ыйын 1 күнүттэн саҥа өйөбүллэри туһаныахтара.