Элбэх оҕолоох ийэ кыбартыыратын аанын алдьаппыттар

Мэҥэ Хаҥалас улууһун Аллараа Бэстээҕэр олорор элбэх оҕолоох ийэ ИДьМ салаатын дьуһуурунай чааһыгар үҥсүү түһэрбит. Ол курдук дьахтар дьиэтин аанын тутааҕын туурбуттар, аан куорпуһа алдьаммыт.

Хоромньу уопсай суумата 43 тыһ.солкуобайга тэҥнэспит. Участковай боломуочуйалаах полиция үлэһитэ  27 саастаах уорбаланааччыны туппут. Биллибитинэн, дьахтар түүннэри дьиэ көрүдүөрүгэр айдаарар эдэр дьоҥҥо туһаайан чуумпуралларыгар эппит. Уорбаланааччы маны сөбүлээбэккэ  арыгы иһэн баран дьахтар аанын кэлэн дарбыйбыт.

РФ Холуобунай кодексатын 167 ыст. 1 ч. «Киһи баайын-дуолун соруйан алдьатыы, эмсэҕэлэтии иһин» холуобунай дьыала тэриллибитин туһунан ИДьМ пресс-сулууспата иһитиннэрэр.