Элбэх оҕолоох ийэлэр болдьоҕун иннинэ биэнсийэҕэ тахсыахтарын сөп

Үс уонна онтон элбэх оҕону төрөппүт дьахталлар, сөптөөх үлэ ыстаастаах буоллахтарына, болдьоҕун иннинэ биэнсийэҕэ тахсар бырааптаахтар. Бу туһунан ТАСС ааҕыныстыбатыгар Г. В. Плеханов аатынан РЭУ судаарыстыбаннай уонна муниципальнай үп кафедратын бэрэпиэссэрэ Юлия Финогенова иһитиннэрдэ.

«Сокуонунан элбэх оҕолоох ийэлэргэ биэнсийэҕэ тахсар чэпчэтиилэр олохтоммуттара. Ол курдук, үс уонна онтон элбэх оҕону төрөтөн ииппит дьахталларга, оҕолоро 8 саастарын туолбут, үлэ ыстаастара 15 сылтан итэҕэһэ суох уонна 22-тэн итэҕэһэ суох биэнсийэ коэффициеннаах буоллахтарына, болдьоҕун иннинэ биэнсийэҕэ тахсар кыах баар. Үс оҕону төрөппүт дьахталларга биэнсийэҕэ тахсар саас – 57; түөрт оҕону төрөппүттэргэ – 56; биэс уонна онтон элбэх оҕону төрөппүттэргэ – 50 саас буолар», – диэн эспиэр эттэ.

Икки оҕону төрөппүт дьахталлар Хотугу оройуоннарыгар 12 сылтан итэҕэһэ суох, эбэтэр онно тэҥнээх сирдэргэ 17 сылтан итэҕэһэ суох үлэлээбит буоллахтарына, 50 саастарыгар болдьоҕун иннинэ биэнсийэҕэ тахсыахтарын сөп.

Кинилэргэ өссө биир ирдэбил – 20-тэн тахса сыллаах үлэ ыстааһа баар буолуохтаах. Финогенова ону таһынан, элбэх оҕолоох аҕаларга болдьоҕун иннинэ биэнсийэҕэ тахсар кыах көрүллүбэтин эбэн эттэ.