Элбэх оҕолоох ийэлэр Москваҕа пуорумҥа кытыннылар

Бу күннэргэ Москваҕа «Россия» национальнай кииҥҥэ Элбэх оҕолоох ыаллар пуорумнара буолан ааста.

Манна  Саха сириттэн Галина Сидорова салайааччылаах «Счастливый мир» диэн Дьокуускай куорат элбэх оҕолоох ийэлэрин уопсастыбаннай холбоһуга кытынна.

Кыргыттар аныгылыы моһуоннаах, норуоттарын култууратын көрдөрөр көстүүмнэри, сахалыы сиэдэрэй симэхтэри кэтэн, дьон болҕомтотун тартылар.

Тэрээһин дойду араас муннугуттан, көхтөөх төрөппүттэри түмтэ.  Бу ыаллар үс, түөрт, уонча оҕону иитэллэрин таһынан, уопсастыбаннай бырайыактарга, волонтердааһыҥҥа, айар үлэҕэ уонна успуорка кытталлар.

Пуорум уопут атастаһыыга, өйөбүл дьаһалларын ырытыыга уонна, саамай сүрүнэ, элбэх оҕолоох дьиэ кэргэттэр саҥа уопсастыбаннай имиджтэрин үөскэтиигэ бэртээхэй былаһаакканан буолла.

Билигин Арассыыйаҕа элбэх оҕолоох ыалга араас өйөбүл миэрэлэрэ бааллар, элбэх оҕолонуу сыыйа-баайа нуорма эрэ буолбакка, олоххо ситиһии дьиҥнээх бэлиэтинэн буолан эрэр. Дьиэ кэргэҥҥэ баҕалаах уонна күүтүүлээх оҕо ахсаана элбээбитэ бэлиэтэнэр.

«Счастливый мир» холбоһук бу тэрээһиҥҥэ кыттарга көмө буолбут биир дойдулаахтарыгар махталын тиэрдэр: Судаарыстыбаннай Мунньах (Ил Түмэн) сис кэмитиэтин бэрэссэдээтэлэ Алена Атласоваҕа,  Дьокуускай куорат баһылыгын социальнай боппуруостарга солбуйааччы Владимир Аржаковка, Дьокуускай куорат дьаһалтатын уопсастыбаннай сибээскэ, ыччаты кытта үлэҕэ управлениетын начаалынньыга Андрей Михайловка, управление отделын начаалынньыга Туйаара Звереваҕа, «Якутия» ААУо авиахампаанньа салайааччытыгар — генеральнай дириэктэр эбээһинэһин толорооччу Галущенко Владислав Станиславовичка, “Эрэл” ателье хаһаайката Надежда Неустроеваҕа.

Чэмэлиинэ Скрябина.