Элбэх оҕолоох ийэлэр «Үлэ бэтэрээнэ» буолалларыгар үлэ ыстааһын кыччаттылар

Ил Түмэн уочараттаах пленарнай 43-c мунньаҕар Федеральнай сокуоннар барылларыгар,  Үлэ бэтэрээнэ ааты ылыыга уларыйыылар киирдилэр. Ол курдук, урукку өттүгэр сокуон хараҕынан Үлэ бэтэрээнэ буоларга 20 сыл ирдэнэр эбит буоллаҕына, түөртэн элбэх оҕолоох Арктическай оройуоҥҥа олорор, уон сылтан кырата суох үлэлээбит ийэлэр үлэ бэтэрээнэ буолар кыахтаныахтара.

Бэлиэтээн суруйдахха, Арктическай зонаҕа олорор ийэлэр, ону сэргэ иитэ ылбыт оҕолордоох ийэлэр эмиэ хапсаллар. Маны сэргэ «Мать героиня», «Высшая благодарность матери»,  I, II, III истиэпэннээх «Материнская слава» диэн судаарыстыбаннай наҕараадаҕа тиксибит ийэлэр уон сыл ыстаастаах буоллахтарына, үлэ бэтэрээнэ буолар кыахтаналлар.

Бырайыак сүрүн соруга дьахтар аймах социальнай өттүнэн көмүскэллээх буолуутугар туһуланар. Бэлиэтээн эттэххэ, өйөбүл миэрэлэрин ситэрэн биэрэр туһунан Ил Дархан Айсен Николаев сорудахтаата.