Элбэх оҕолоох ийэлэргэ судаарыстыбаннай наҕараадалары туттардылар

Арассыыйаҕа сэтинньи 30 күнүгэр бэлиэтэнэр Ийэ күнүн көрсө СӨ Бырабыыталыстыбатын дьиэтигэр элбэх оҕолоох ийэлэри наҕараадалаатылар.

Cудаарыстыбаннай наҕараадалары СӨ премьер-миниистирэ Кирилл Бычков туттарда, үөрүүлээх тэрээһин кыттыылаахтарын кэлэн иһэр Бүтүн Арассыыйатааҕы Ийэ күнүнэн эҕэрдэлээтэ. Кини Саха сиригэр дьиэ кэргэни өйөөһүҥҥэ улахан болҕомто уурулларын бэлиэтээтэ.

«Ийэ буолууну уонна оҕо сааһы өйөөһүн, дьиэ кэргэн институтун бөҕөргөтүү, дьиэ кэргэн сыаннастарын үрдэтии Саха сирин социальнай бэлиитикэтин биир сүрүн хайысхатынан  буолуоҕа. Өрөспүүбүлүкэҕэ дьиэ кэргэни бөҕөргөтүү, элбэх оҕолоох уонна иитэр төрөппүттэри өйөөһүн, демографическай балаһыанньаны тупсарыы, дьахталлар бары эйгэҕэ бэйэлэрин сайыннаралларын уонна үлэнэн хааччыллыыларын боппуруостарыгар улахан болҕомто ууруллар. Ол курдук, өрөспүүбүлүкэтээҕи ийэ хапытаалын кээмэйэ икки төгүл улаатан, 300 тыһыынча солкуобайга тиийдэ.

«Ийэҕэ үрдүк махтабыл» ураты бэлиэнэн наҕараадаламмыт ийэлэр харчынан бириэмийэлэрэ сүүс тыһыынча солкуобайга тиийэр, оттон «Дьоруой ийэ» бэлиэни туттарыы мөлүйүөн солкуобайдаах төлөбүрүнэн доҕуһуолланар. Бу дьаһаллар Саха сирэ демографическай балаһыанньанан бастыҥнар кэккэлэригэр киирэригэр көмөлөһөллөр», — диэтэ Бычков. Кини ону тэҥэ Арассыыйа бэрэсидьиэнэ Владимир Путин Саха сирэ демографияны тупсарыыга ситиһиилэрин хаста да бэлиэтээбитин тоһоҕолоото. Бүгүҥҥү күҥҥэ элбэх оҕолоох ыал ахсаана бигэтик үрдээн, 34 тыһыынчаттан таҕыста.

«Өрөспүүбүлүкэ бырабыыталыстыбата инникитин да социальнай эйгэҕэ үбү угар, доруобуйа харыстабылын систиэмэтин сайыннарар, саҥа оскуолалар уонна оҕо уһуйааннара, успуорт уонна култуура эбийиэктэрэ тутуллалларын өйүүр, ийэҕэ харыстабыллаах сыһыан үгэстэрин харыстыыр уонна бөҕөргөтөр үлэни салгыаҕа. Бу дьаһаллар ийэлэргэ Саха сирин үтүө көлүөнэтин иитэн-такайан таһаарарга көмөлөһүөхтэрэ диэн эрэнэбин», — диэн бырабыыталыстыба бэрэссэдээтэлэ эбэн эттэ.

Үөрүүлээх тэрээһиҥҥэ «Дьоруой ийэ» бэлиэнэн Нам улууһуттан Анастасия Сивцева наҕараадаланна. Кини — уон оҕо ийэтэ.

Кирилл Бычков ону тэҥэ тоҕус оҕону төрөтөн, иитэ сылдьар Уус Алдан улууһуттан Любовь Колодезниковаҕа «Ийэ албан аата» I истиэпэннээх бэлиэни туттарда.

«Ийэ албан аата» II истиэпэннээх бэлиэни Мэҥэ Хаҥалас улууһуттан Виктория Афанасьева, Горнай улууһуттан Сахая Илюхина, Бүлүү улууһуттан Сардаана Филиппова, Кэбээйи улууһуттан Уйгулаана Эверстова, Дьокуускай куораттан Лира Индеева ыллылар. Кинилэр — аҕыс оҕо төрөппүттэрэ.

Сэттэлии оҕону иитэр Горнай улууһуттан Варвара Аввакумова уонна Нам улууһуттан Александра Кривошапкина «Ийэ албан аата» III истиэпэннээх бэлиэнэн наҕараадаланнылар.

Итини таһынан, Өрөспүүбүлүкэтээҕи килиниическэй балыыһа поликлиникатын сэбиэдиссэйигэр, быраас-терапевка Алена Сергееваҕа «СӨ үтүөлээх бырааһа» бочуоттаах аат иҥэрилиннэ. Өҥө оҥоруу эйгэтин үтүөлээх үлэһитинэн «Колми» ХЭТ генеральнай дириэктэрэ Наталья Румянцева буолла. СӨ Ил Дарханын Грамотатын СПИД-ы уонна сыстыганнаах ыарыылары сэрэтиигэ уонна утары охсуһууга өрөспүүбүлүкэтээҕи киин быраас-методиһа Надежда Петрова, оттон бырабыыталыстыба грамотатын Үөһээ Бүлүү улууһуттан педагогическай үлэ бэтэрээнэ Тамара Николаева тугта.

«Бочуоттаах аҕа» бэлиэни Чурапчы улууһуттан Василий Жирковка туттардылар. «Гражданскай килбиэн» ураты бэлиэнэн Дьокуускайтан Александр Павлов наҕараадаланна. «Дьиэ кэргэн килбиэнэ» ураты бэлиэни ыаллыы буолан олорор Гаврил уонна Галина Игнатьевтар, Анатолий уонна Александра Михайловтар ыллылар.