Салгыы
Элбэх оҕолоох ийэлэри тупсарар бырайыак

Элбэх оҕолоох ийэлэри тупсарар бырайыак

07.10.2022, 11:54
Бөлөххө киир:

Быйыл Ил Дархан Айсен Николаев биллэрбит Ийэ сылыгар элбэх тэрээһин ыытыллар. Биир ураты бырайыагынан элбэх оҕолоох ийэлэри уларытар, тупсарар сыаллаах “Преображение” буолар.

Бу бырайыак чэрчитинэн, ыам ыйыгар Дьокуускай куорат уокуруктарынан, уопсастыбаннай түмсүүлэринэн тарҕанан, ийэлэри талбыттара. Барыта 26 дьахтар кыттыан баҕарбытыттан, 9 ийэни талан ылбыттара. Талалларыгар сааһыттан тутулуга суох, үстэн элбэх оҕолоох, социальнай кыһалҕалаах, доруобуйатыгар туох эрэ кэһиллиилээх, улахан ыйааһыннаах буолуохтаах диэн киритиэрийдээхтэр этэ.

Бэс ыйыгар кыттааччылар Уопсастыбаннай доруобуйа өрөспүүбүлүкэтээҕи киинигэр доруобуйаларын туругун бэрэбиэркэлэммиттэрэ, чинчийиини ааспыттара. Терапевт, невролог, офтальмолог, кардиолог быраастарга көрдөрүммүттэрэ. Салгыы эндокринологическай диспансерга эндокринолог-бырааска көрдөрүнэн, УЗИ-га түспүттэрэ, диабетка, гормоннарга анаалыс туттарбыттара. Онтон 1-кы №-дээх поликлиника иһинэн үлэлиир “Орхидея” диэн дьахтар консультациятыгар акушер-гинекологка көрдөрүнэн, УЗИ-га, маммографияҕа түспүттэрэ, элбэх анаалыһы туттарбыттара. Онкомаркер анаалыстарын туттаран, искэн ыарыыларыгар бэрэбиэркэни ааспыттара.

От ыйыгар психолог консультациятын ааспыттара. Маны тэҥэ, Дьиэ кэргэн, ыччаты социальнай-психологическай өттүнэн өйүүр киин психологтара үҥкүү хамсаныытынан, айар үлэнэн уоскутар, уйулҕаны эмтиир дьарыктары ыыппыттара.

Кинилэргэ диетолог-быраас А.Саввина сөпкө аһааһын, хамсаныы, доруобуйаны көрүнүү туһунан элбэх лиэксийэлэри аахпыта, марафону ыыппыта. Онон бастааҥҥытан астарын көрүнэн, күн аайы тугу сиэбиттэрин отчуоттаан испиттэрэ. Үчүгэйэ диэн, ийэлэр астарын көрүнэр буоллахтарына, дьиэ кэргэннэрэ, оҕолоро эмиэ сөпкө аһыыр буолаллар, мантан кинилэр доруобуйалара тупсар.

Физкултуура, спорт управлениетын тириэньэрэ нэдиэлэҕэ үстэ фитнес дьарыктарын ыыппыта. Бу түмүгэр кэрэ аҥаардар ыйааһыннарын түһэрэн, доруобуйалара тупсан, настарыанньалара көтөҕүллэн, бэйэлэрин көрүнэр, сыаналыыр, таптыыр буолбуттара харахха быраҕыллар. Саамай сүрүнэ, кинилэр тубустахтарына, кэргэннэрэ, оҕолоро эмиэ уларыйаллар. 

Атырдьах ыйыгар Үлэ, социальнай сайдыы министиэристибэтин үлэһиттэрэ кыттыылаах “төгүрүк остуолга” элбэх оҕолоох дьиэ кэргэттэргэ сыһыаннаах боппуруостары (босхо сир учаастактарын биэрии, нолуокка чэпчэтиилэри, субсидиялары оҥорторуу, судаарыстыбаттан көмөнү ылыы, о.д.а.) ырытыспыттара. Манна тустаах министиэристибэлэр, тэрилтэлэр үлэһиттэрэ кэлэн кыттыбыттара. Исписэлиистэртэн туох баар ыйтыыларыгар толору хоруйу ылан, боппуруостарын быһаартаран, ийэлэр олус астыммыттара, билиилэрэ да кэҥээбитэ.

Алтынньы 6 күнүгэр визажистар, стилистэр көмөлөрүнэн ийэлэри кырааскалаан, таҥыннаран баран, хаартыскаҕа түһэрдилэр.

Онтон алтынньы 22 күнүгэр сыл аҥаардаах үлэ түмүктэнэн, Ийэ күнүн чэрчитинэн “Куруһаалаҕа” ыытыллар “Здоровая Я” дьаарбаҥка-аахсыйаҕа күрэс түмүгүн таһаарыы, кыайыылаахтары наҕараадалааһын буолуоҕа.

Бу бырайыакка олус элбэх тэрилтэ кыттыста. Ол курдук, тэрийээччилэр – доруобуйа харыстабылын министиэристибэтэ, Уопсастыбаннай доруобуйа уонна мэдиссиинэ профилактикатын киинэ, “Мой Бизнес” киин, “СахаЭкспоСервис” тэрилт, Үлэ, социальнай сайдыы министиэристибэтэ, физкултуура, спорт министиэристибэтэ, инновация, цифровой сайдыы уонна информационнай технологиялар министиэристибэлэрэ кыттыстылар.

“Преображение” бырайыак тэрийээччилэрэ фотосессияны ыытарга үлэлээбит хамаандаҕа – стилистэр Николай Неймоховка, Нарыйаана Лаврентьеваҕа, Дарья Габышеваҕа (Брониславаҕа), Вероника Марковаҕа, визажистар Элла Погодаеваҕа, Ади Даниловаҕа, фотограф Туяра Андрееваҕа уонна видеограф Василий Барановка, уобарастары таҥарга көмөлөспүт «LiAmi», «Mango», «TopLady» маҕаһыыннарга махталларын биллэрэллэр. Кинилэр социальнай аахсыйаҕа кыттыһан, төлөбүрэ суох үлэлээбиттэрэ хайҕаллаах.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
19 мая
  • 7°C
  • Ощущается: 6°Влажность: 39% Скорость ветра: 2 м/с

Сообщить об опечатке

Текст, который будет отправлен нашим редакторам: